Shillong, Lber 31
Ka Ghana ka la weng noh ïa u manager u Otto Addo, 72 sngi shwa ban sdang ka FIFA World Cup.
Kane ka jingshah weng noh u Addo ka la wan hadien ba ka jingrem da 2-1 kol ha ka Germany ha ka jingïalehkai paralok ha Stuttgart ha ka lah sngi U Blei bad ruh ka jingshah rem da 5-1 kol ha ka Austria ha Vienna ha ka sngi Thohdieng jong ka taïew ba la lah.
Ka Ghana kaba don ha kajuh ka group bad England na ka bynta ka World Cup, ka la shah rem ha ki saw tylli ki jingïalehkai ba la dep bad watla ka la don ïa u rangïalehkai shapdeng jong ka Manchester City, u Antoine Semenyo bad u rangïalehkai shapdeng ka Tottenham, u Mohammed Kudus, hynrei kam shym la lah satia ban rung sha ka Africa Cup of Nations 2025 hapoh ka jingïalam jong u Addo.
Hadien ka jingïalehkai jong ka Germany, ka Ghana Football Association ka la ong ba ka la dep ban weng noh ïa u Addo bad un ym lah shuh ban dangïai bteng ïa kane ka kam.
Ka la bynrap, “Ka The Ghana Football Association kan sa pyntip ïa ka jingtreikam ba thymmai na ka bynta ka kynhun ïalehkai ha ka por kaba biang.”
U Addo, uba la 50 snem ka rta, la kha ha Germany bad u la pynlut ïa ka jingim ïalehkai jong u na ka bynta katei ka ri, ha kaba u la don bynta haduh 15 tylli ki jingïalehkai na ka bynta ka Ghana, bad u la sdang ïa ka samoi kaba ar jong u kum u manager jong kane ka kynhun ïalehkai ha u Lber jong u snem 2024.
Ïa kane ka lympung ïalehkai World Cup ka ban long ha Canada, Mexico bad USA, kan sdang naduh 11 tarik u Jylliew haduh 19 tarik u Naitung.
Ha katei ka lympung, ka Ghana kan sdang ïa ka jingïalehkai kaba nyngkong pyrshah ïa ka Panama ha ka 18 tarik u Jylliew hashwa ba kan ïakynduh pyrshah ïa ka England ha ka 23 tarik bad ïa ka Croatia ha ka 27 tarik.
