Shillong, Ïaïong 01
Ka lympung ïalehkai Meghalaya State League (MSL-5) kan sdang biang naduh ka 11 tarik mynta u bnai Ïaïong ha kaba kin don 33 tylli ki kynhun ki ban ïashim bynta bad yn phiah ïa ki ha ki phra tylli ki group na ka bynta ban ïaknieh ïa ka nam lahduh.
Ïa kane ka lympung ban pynïaid da ka Meghalaya Football Associa-tion, yn kyrshan jingïarap pisa da ka tnat ïalehkai jong ka Sorkar Jylla.
Dei ha kane ka lympung ba ki lahduh na ki synjuk ïalehkai phutbol ba la pynïasnoh bad ka MFA, ki ïakhun na ka bynta ban ïoh phong ïa ka pansngiat kum ki lahduh, bad kaba plie lad ruh ïa ki ban bteng ha ka ban ïashim bynta sa ha ki lympung ïalehkai ban pynlong da ka AIFF.
Kumba ka long mynta ka snem ka MSL kan long kaba kham kyrpang hadien ba ka MFA ka don hapdeng ka jingrakhe ïa ka jingdap ba 50 snem naduh ba la seng ïa ka.
Ka jingïalehkai sdang ha kane ka lympung kan long ha SSA Stadium kaba ha First Ground, Polo, kaba dei artad ka madan ka ban pynlong ïa ki jingïakhun jong ka Group-A kaba kynthup ïa ka lahduh jong ka Champions Cup 2025 ka Nongkseh SSCC (Shillong SA), Mawshun SCC (Riwar Mihngi Football Association), Khimusniang SC (West Jaiñtia District SA) bad ka Umkaber SCC (Tyrsad Area SA).
Ki kynhun kiba don ha ka Group-B ki ban ïakhun ha madan MFA Turf Third Ground Polo ki long ka Nangkiew Irat SC (Shillong SA), Mulang SC Nongbah (West Jaiñtia DSA), Mawlum Tyrsad SCC (Tyrsad Area SA) bad ka Mawphu SC (Sohra SA).
Ha ka Group-C yn pynlong ha madan Amlarem ha kaba ki kynhun ki long ka Amlarem SC, Lamin XI SCC (Amlarem Sub-Division SA) bad ka Laskeiñ SCCC (Laskeiñ Block SA).
Katba ka Khliehriat kan ïoh ba kan pynlong ïa ki jingïalehkai jong ka Group-D kiba kynthup ïa ka Ladthadlaboh SC (West Jaiñtia DSA), Rymbai Shkenshynriah SC (East Jaiñtia DFA), Thangskai Tiger SC (East Jaiñtia DFA) bad ka Jalaphet Moochut Pyrdung SC (Saipung Block SA).
Ka Group-E la buh ban pynlong ha madan Wahïajer ha kaba ki kynhun ki long ka Shillong Lajong (Shillong SA), Lumphyrnai Lum-sohphoh FC (Thadlaskeiñ SA), Ïatyllilang Lumsehkot SCC (Laskein Block SA) bad ka Lamyrsiang SCC (Saipung Block SA).
Ka Group-F kan long ha madan Mairang ha kaba ki kynhun ki long ka Langsning FC (Shillong SA), Mission SCC (Pyndengumïong DSA), Umlakro FC (Western Ri-Bhoi DSA) bad ka Lawbah SC (Eastern Border SA).
Ha ka Group-G ki san tylli ki kynhun bad ba la buh ban pynlong ha Williamnagar. Ki kynhun ki kynthup ïa ka A’chik SCO (East Garo Hills DSA), Atong Matgrik FC (South Garo Hills DSA), Maram FC (Tura DFA), Balmanduri FC (North Garo Hills DSA) bad ka Janepih Youth SCA (Mawshynrut SA)
Katba ha ka Group -H kan long ha madan Mawkyrwat ha kaba ki kynhun ki long ka Rangdajied United FC (Shillong SA), Mawten SC (Mawkyrwat DSA), Mawlar-shong SC (Nongstoiñ DSA) bad ka Umdang SC (Mawshynrut SA).
