Shillong, Ïaïong 01
Ka Hynñiewtrep Youths’ Council (HYC) ka la pynrem jur ïa ka rai jong ka Meghalaya Transport Corporation (MTC) ban pynsangeh noh ïa ka jingshakri ki bos ban kit ïa ki khynnah skul, da kaba kdew ba kane ka la wanrah ïa ka jingeh kaba khraw ïa ki khynnah skul bad ki kmie ki kpa ba ha kylleng ka nongbah Shillong bad ki jaka ba marjan.
“Kane ka jingpynsangeh kynsan ïa ka jingai jingshakri ki bos ka la buh jingeh bad ka jingkit kaba khia ïa ki kmie ki kpa kiba la don lypa hapdeng ka jingïaleh ban pyndap pynbiang ïa ka jinglut jingsep namar ka jingkiewdor haba ïadei ka pule puthi” ong ka kyrwoh khubor u Secretary ka Education Cell ka HYC u Bah Enlang Sawian.
Ka HYC ka la pynpaw ïa ka jingkyrshan ïa ki kmie ki kpa kiba ïakhih ban pynpaw ïa ki jingsngewkhia namar kane ka jingpynsangeh ïa ki bos bad ong ba ki dei hok ba kin pynpaw ïa ki jingeh kum ki kmie ki kpa bad ki longïing kiba shaniah ha kine ki bos.
Shuh-shuh la ong ba ka jingpule ka long kum u païa bah ban kyntiew ïa ka roi ka par jong ka imlang sahlang bad ka dei ka kamram jong ka Sorkar ban thaw ïa ki lad ki lynti ban pynlong ïa ka pule puthi kaba bit ba biang bad ka ban pynsuk ïa samla pule khamtam ïa kito kiba wan na ka longïing ba duk bad ba duna ka ïoh ka kot.
Ka HYC ka la dawa na ka Sorkar Jylla bad ki bor ba dei peit ba ki dei ban pynphai biang mardor ïa ka jingshakri ki bos MTC na ka bynta ki khynnah skul, da kaba kdew ba dei ban buh hakhmat eh ïa ka bha ka miat bad ka lawei jong ki khynnah skul.
