Shillong, Ïaïong 01
Ka Italy kaba la rah saw sien ïa ka nam lahduh, ka la duh ban rung sha ka World Cup ha ka sien kaba lai lynter, hadien ba ka la shah rem noh ha ka Bosnia and Herzegovina lyngba ka tie-breaker da 4-1 kol ha ka ‘playoff’ kaba la long ha ka sngi Balang ha Zenica.
Da kane ka jingshah rem, ka Italy ka la long ka kynhun kaba nyngkong na ki lahduh barim ban duh rung sha ka World Cup haduh lai sien kynthih, ha kaba ym don uwei ruh na ki nongïalehkai ba mynta jong ka kynhun uba la ïashim bynta ha kane ka kynhun.
Ha kane ka jingïakhun u Moise Kean u la ïoh ban pynkhih jar nyngkong na ka bynta ka Italy ha ka minit kaba 15, hynrei kane ka kynhun ka la duh noh ïa u rangïalehkai ‘dien u Alessandro Bastoni (41) uba la shah sei da ka red card hashwa ba ka Bosnia kan pynphai kylla lyngba u Haris Tabakovic ha ka minit kaba 79.
Watla ka Italy ka la ïalehkai satang shiphew ngut ki rangïalehkai, pynban ïa kane ka jingïakhun la hap ban rah shaduh ka extra time bad haduh kaba kut ki la ïakhaid mar 1-1 kol. Dei ha ka jingïashut ïa ka tie-breaker ba u Pio Esposito bad u Bryan Cristante ki la pynlehnohei ïa ki kabu ksiar ban thep kol, katba u Esmir Bajraktarevic uba la kha ha U.S. u la lah ban pynurlong na ka bynta ka kol kaba khatduh jong ka Bosnia.
“Ngim sngew lah ban mutdur ba ngi la kut noh ka jingïaid lynti”, la ong u rangïalehkai ‘dien ka Italy, u Leonardo Spinazzola. “Ka long ka jingsngewsih ïa ngi ki nongïalehkai, kiba haïing hasem, bad ïa baroh ki khynnah ki bym pat ju ïohi ïa ka Italy ha ka World Cup.”
Kane ka jingshah rem ka la nang buh jingeh shuh shuh ïa ka Italy kaba la shah pynduh teng ha ka Sweden bad ka North Macedonia, ha ki ar tylli ki jingïalehkai playoff ban ïaknieh rung sha ka World Cup bad kaba khatduh eh ba ka la jop ha u snem 2006 pyrshah ïa ka France ha ka final.
Lah ban kdew ha ka semi finals playoff na Europe ha ka taïew ba la lah, ka Italy ka la jop ïa ka Northern Ireland da 2-0 kol bad ka Bosnia ka la jop ïa ka Wales lyngba ka tie-breaker.
Ha ki jingïalehkai ‘playoff final’ jong ka Europe hynne ka sngi, ka Sweden bad ka Turkiye ki la ïoh rung sha ka World Cup. Ka Sweden ka la jop ïa ka Poland da 3-2 kol bad ka Turkey ka la jop ïa ka Kosovo da 1-0 kol. Kumjuh ka Czech Republic ka la ïoh rung hadien ba ka la pynliem ïa ka Denmark lyngba ka tie-breaker.
