Shillong, Ïaïong 01
Ka jingtrei shitom ki pulit ka Special Investigation Team jong ka Shillong City ka la pynlong ban ïoh kem noh ïa uba donkti ban pynïap ïa u heprit Kyrshanbor Kharmudai, uba dang hynñiew snem ka rta hadien hynriew bnai ka jingtohkit.
Haba ïakren bad ki nongthoh khubor, u Bah Vivek Syiem uba dei u Superintendent of Police (SP) ka East Khasi Hills District u la ïathuh ba une uba donkti ban pynïap ïa u heprit ha Nongrah u dei uba la tip kyrteng u Kennedy Khongsit, 32 snem ka rta.
U la ïathuh ba ïa une u Kennedy ki pulit ki la ïoh kem ha ka sngi Balang bad lashai kin rah sha ïingbishar ban pan por ban ïoh ban tohkit shuh shuh.
U Bah Vivek u la ïathuh ba u Kennedy u la bitar ïa une u heprit namar um treh ban sait ïa ka top kumta u la set na shyntur bad nakhmut ban thep hapoh ka top kaba don um mar shiteng bad hadien kata u la sei ban buh hadien jong ka ïing.
U la pyntip haba ka kmie jong u bad u para arkmie ki wan sha ïing da ka scooty, u la thep ïa ka met jong une u khynnah ha byrni bad pan ïa ka scooty bad sa kit pat ïa ka metïap ban leit bret sharud surok ha Mawpat.
Shuh shuh u Bah Vivek u la ong ba kane ka jingjia ka long shisha kaba eh ban lapdien namar une u runar u la sngew laitluid haba ki pulit kim lapksai hadien shi bnai ar bnai.
U la pyntip ba ha kine ki bnai ki pulit kim lah ban kem khlem da lah ban don ki sakhi kiba biang hynrei hadien ba la dep shim nongmuna lut, sa lap ïa une u briew ba donkti ban pynïap.
Kumban shu pynkynmaw u heprit Kyrshanbor Kharmudai u dei u khunswet uba la jah na la ïing katba u dang ïalehkai bad ki para kaba dei ha ka por janmiet ha ka 8 tarik Risaw 2025 hynrei hadien ba la wad shnong, ha ka sngi ba bud kaba dei ka 9 tarik Risaw la lap ïa ka metïap jong une u heprit harud jong ka shnong Mawpat.
