Jowai, Ïaïong 01
Ka jingmaramot pynbha ïa ka Kiang Nangbah Stadium kaba ha Ladthadlaboh, Jowai ka la nangjam shaphrang hadien ba ka la ïoh ïa ka jingmynjur na ka Sorkar Jylla ban pynlut kumba T.16 klur tam.
Kane ka jingmaramot ka kynthup naduh ka jingshna ïa ki jaka shong ki paidbah nongpeitkai, ka jingpynwandur ïa ka jaka shong ki heh ki haiñ ne ki VIP, ka jingsiang ïa ka Synthetic Athletic Track, ka jingbujli thymmai ïa u phlang plastik ne artificial turf, ban shna ïa ki kamra khreh ki nongïalehkai, bad ka jingker kynroh ïa baroh kawei ka madan.
Kane ka jingmaramot pynbha ïa katei ka stadium ka long na ka bynta ka jingbit jingbiang ki nongïalehkai, ki paidbah nongpeitkai bad ruh ban pynkhreh na ka bynta ban pynlong ïa ki jingïalehkai kiba heh ha ki por ban wan.
Kumba ka long mynta ka Jylla kan pdiang ban pynlong ïa ka lympung ïalehkai kaba heh hapoh ka ri kata ka 39th National Games ha u 2027. Te kumta ka Kiang Nangbah Stadium ka lah ban long kawei na ki jaka ïalehkai na ka bynta katei ka lympung.
