Jowai, Ïaïong 01
Ki nongrep jong ka shnong Lapangap hapoh West Jaiñtia Hills District kila bteng biang ban ïakynduh ïa ka jingeh haba ïadei bad ka rep ka riang.
U Waheh Shnong ka Lapangap Ma Deimonmi Lyngdoh u la pyntip ba ki nongrep ka shnong Lapangap ha ka 31 tarik Lber kila hiar rep sha ki lyngkha kba, da ka jingthmu ban rep ban riang, hynrei haba ki poi ha lyngkha kba kim shym la ïohlad satia ban rep namar ka jingshah khanglad ha ki pulit jong ka Assam.
Ki lyngkha kba kiba ki nongshong shnong Lapangap kiba ym pat ïoh satia ban leit rep mynta u snem, ki long ha wah Umchyrngan, wah Um-Lakawang, wah Liar-Iongskai, bad wah-Liarsamit nalor kiwei kiwei.
Ki nongrep ka shnong Lapangap ki ïathuh ba ki pulit ka Assam, kila ong ïa ki ba kin ïaishah, namar ba ka bor pynïaid jong ka Assam kam pat shah ïa ki nong Lapangap ban hiar rep sha kitei ki hali, katba ym pat kut ka ilekshon jong ka Assam haduh ka 9 tarik Ïaïong, 2026.
Ym tang katta, ki nongrep ka Lapangap kila ïathuh, wat tang ban ïalam pynbam phlang ïa ki masi sha jaka ba hap hapoh u pud u sam jong ka Dorbar Shnong Lapangap ruh ki pulit Assam kim ailad satia.
U Ma Deimonmi Lyngdoh u la ong, lada ka Sorkar Meghalaya kam tuklar ne ai jingïada ïa ki nongrep ka Lapangap, ki nongshong shnong kim banse ha kano kano ka sngi, ha kano kano ka por kin hap ban mih paidbah ban leit rep sha kitei ki lyngkha namar ba la dier ka por rep por riang.
Halor ka jingbym ïohlad ban hiar rep, u Ma Deimonmi u la ong, ka Dorbar Shnong ryngkat ka Elaka Shilliangmyntang kila dep ban pyntip lyngba ka jingthoh sha u Deputy Commissioner jong ka District naduh u bnai Kyllalyngkot, 2026 hynrei haduh mynta mynne ym pat ïoh satia kano kano ka jubab na ki.
