Shillong, Ïaïong 01
Ka long shisha ka khubor kaba pynkyndit ban ïoh sngew ba u MDC uba don ha kajuh ka seng bad uba dei ruh u Chairman ka Jaiñtia Hills Autonomous District Council ba un shah leh kiar ha u CEM bad ki EM namar ki la pynkha ïa kawei ka shnong khlem da pyntip sha une u MDC.
Une u MDC uba la shah leh kiar, u dei u Dr. Sanky Shangpung uba dei u MDC ka NPP na Bataw Lakadong constituency bad uba dei ruh u Chairman ka Jaiñtia Hills Autonomous District Council (JHADC) u la shah kynthoh ha ki paidbah ka shnong Huroi tang namar ba ki pyrshah haba pynkha shnong thymmai.
Ban tip ïa ka jingshisha, la ïoh ban ïakren bad u Dr Sanky uba la pynpaw ba un don ryngkat bad ki paidbah ka shnong Huroi namar ka Executive Committee ka la pynkha shnong thymmai khlem da kynjoh ktien ïa u.
Kane ka jingpynpaw jong u Dr. Sanky ka dei hadien ba ki paidbah ka shnong Huroi bad ka shnong Lahalein ki la leit tur hakhmat ka ophis ka JHADC ha Jowai mynha ka 31 tarik u bnai Lber ban dawa pyndam ïa ka shnong thymmai kaba dang shu pynkha kaba la tip kum ka shnong Umpyrshin kaba hap ha East Jaiñtia Hills.
U Dr Sanky u la ïathuh ba u la dep ïakynduh ïa u CEM ka JHADC Bah Thombor Shiwat uba la kular ban pyndam noh ïa kane ka shnong thymmai hynrei un thaw ïa ka Tribunal Committee ban shong ha ka 7 tarik mynta u bnai bad hadien kata ki ophisar kin leit jurip ïa kane ka shnong, bad un sa pyndam noh.
U la pyntip ba ka Executive Committee ka la pynmih ïa ka jingpynbna ha ka 28 tarik u bnai Rymphang ban ai shnong ïa ka Umpyrshin.
“Nga sngewsih ban pyntip ba don kiba kynthoh ïa nga ba nga leit bamkhana ha kane ka sngi ba ki wan tur sha JHADC namar nga don ha shnong ba don ba ïap briew,” u la ong.
U la ïathuh ba u la dep batai ïa ki nongïalam shnong ba kam long ba kin wan ha ka 31 tarik mynta u bnai namar ki dkhot ka EC ki leit jurip ïa ka jaka tihmaw ha Ratacherra hynrei haba ki la wan kim shym la ïakynduh ïa u CEM ne u EM.
Shuh shuh u la pyntip ba kane ka shnong thymmai ka Umpyrshin ka don kumba 70 ïing hynrei ki don kumba 50 ïing eiei kiba pyrshah ban mih shnong thymmai.
