Shillong, Ïaïong 01
U Myntri ba dei peit ïa ka tnad Civil Defence and Home Guards u Brening A. Sangma u la ong, ka Jylla Meghalaya ka ju shah ktah bha ha ka jingshlei um, ka jingtwa khyndew dei namar ka jinglong jingman ki jaka bad na ka daw jong ka jingjur slap ha ka Jylla.
Ïa kane u Myntri u la ong haba ai jingkren ha ka jingrakhe ka ophis Directorate of Civil Defence and Home Guards ïa ka sngi ba la seng ïa ka State Disaster Response Force (SDRF) Battalion ha ka jingïalang ba la pynlong ha Mawdiangdiang, Shillong.
Shuh-shuh u Myntri u la ong ruh namar kine ki jingjia twa khyndew, ka jingshlei um bad kiwei ki jingjia ba sngewsih bad ka Sorkar Jylla ka pynkhreh ïa ka kynhun SDRF na ka bynta ban pynkloi bad ban pynkhlaiñ ïa ki lad jingïarap haba don ki jingjia ba sngewsih bad ka jingdon ka kynhun SDRF Battalion ka dei ka sienjam kaba kongsan ha ka ban ïaleh pyrshah ïa kine ki jingeh ha ka Jylla.
U Myntri u la ong ba kane ka jingrakhe ka long ka jingsngew sarong bad kaba don jingmut ïa ka Jylla, u la pynpaw ba ïa ka kynhun SDRF la thaw da kaba pynïasoh lang ïa ka kynhun shipai pahara khappud, da kaba pyndonkam hok ïa ki briew bad ki jingdon jingem kiba la shah hikai kiba la don lypa na ka bynta ka bynta kaba kham kyrpang ban ïakhun pyrshah ïa ki jingjia ba sngewsih da ki rukom treikam kiba thymmai nangne shakhmat.
Ka jingpyntrei kam ïa ki SDRF kaba long hapoh jong ka Directorate of Civil Defence and Home Guards yn pynbiang ïa ki tiar pyllait im kiba katkum ka juk ba mynta bad yn hikai ïa ki ha ki buit ba kyrpang ban ai jingïarap haba jia ki jingjia ba sngewsih. Da kaba shim ïa ka jinglong ryntih bad ka jingtbit jong ki Border Wing Home Guards, la khmih lynti ba kin shakri kum ka bor kaba lah ban shaniah ha ka por ba don ki jingeh, ban don ka bynta kaba kongsan ha kaba pyllait im bad ban ïada ïa ki shnong ki thaw.
U la ong ba ka Sorkar kan nang pynbha ïa ka jingïatreilang hapdeng ki nongshong shnong bad ban ai ka jingshakri kaba bit ba biang haba don kino-kino ki jingjia ba sngewsih, u la khot ruh ïa baroh ban ai ka jingïatreilang ban tei ïa ka Meghalaya kaba kham shngaiñ bad ong ba ka SDRF Battalion kan long kum ka dak jong ka jingkhlaiñ, kaba pynwandur thymmai bad kaba ai ka jingshakri ba aiti lut na ka bynta ki paidbah.
Ha kane ka prokram nalor u Myntri ka tnad Civil Defence and Home Guards u Brenning A. Sangma, la wan ban ïashimbynta lang u Commissioner & Secretary u Vijay Kumar Mantri, ki ophisar bad kiwei pat ki riew pawkhmat.
