Nongstoiñ, Ïaïong 01
Ka Voice of the People Party (VPP) West Khasi Hills District ha ka sngi Balang ka la leit ban ïakynduh ïa ka Deputy Commissioner jong ka West Khasi Hills ban ïakren ha kaba ïadei bad ka jingdkoh ha ka rukom treikam ka District Selection Committee (DSC) bad ban kyrpad ban shimkhia bad ban pynbeit.
La lamkhmat ïa kane ka jingleit ïakynduh da u Bah Bibor Riangtem, President bad u Bah Robert Wahlang, Secretary lem ka jingïadon lang u Bah Golden Nonglong, u Dr. Juristman Iawphniaw, MDC ka Nongstoiñ, ki dkhot ka Women Wing, Youth Wing, dkhot EC ka VPP WKH bad kiwei-kiwei.
Ki katto katne ki mat kaba ka VPP kala pynsngew bad ïakren bad ka DC ki kynthup ban pynbna ïa baroh ki kam ba lait lyngba ki lad paidbah ba la ithuh, nangta ym dei ban don ka jingthung kam da kano kano ka tnad trei kam, ban pynduh noh ïa ka personal interview, ka jingpynbeit ryntih ïa ka jingai mark ha ka eksamin bad interview bad kiwei kiwei.
U Bah Bibor Riangtem u la ong ba ka jingleit ban ïakynduh ïa ka DC ka long halor ki 10 tylli ki mat ha kaba ïadei bad ka DSC na ka bynta ka jingïaid beit ïaid ryntih ka jong ka, nangne shakhmat bad ka VPP ka sngewtynnad ba na ka liang jong ka DC ka la kular ban shimkhia na ka bynta ka jingbha jong ki samla wad kam wad jam.
Shuh shuh u la ong ruh kaba kham sngew tynnad ka long ba na ka liang jong ka DC ka la ong ba nangne shakhmat ïa ka Grade IV ym don personal interview shuh.
U la ong ruh ba ha ki por ba la dep kala don shibun ka jingtharai sniew ïa ka DSC khamtam ha kiba bun ki bynta ha kaba ïadei bad ki jingkylli, ha kaba na ka liang ka VPP ka ïeng ha ka nongrim bakhuid ba suba hynrei sngew tynnad ba nangne shakhmat ka DC ka la kular ban shim ka jingkitkhlieh ba kan long kaba ïaid beit ïaid ryntih ha kaba ïadei bad ka thung kam thung jam.
U MDC ka Nongstoiñ u Dr. Juristman Iawphniaw u la ong ba ym dei ba tang ba ki dei ki khun jongno jongno, ki dei kiba don jingïadei badno badno ba kin ïoh ïa ka kam hynrei kita kiba lah kin ïoh ïa ka hok ka jong ki.
Shuh shuh u la ong ruh ba kane ka dei ka jingud ka jingnam jong ki paidbah ba kan myntoi aiu ïa ki kmie ki kpa ba kin phah ïa ki khun ban pule ha ki kyrdan kiba heh kiba heh hynrei lada ki wan bad wad kam wad jam bad lada kim don ka jingïadei bad ki nongmihkhmat kim lah ban ïoh ïa ka kam.
“Kane ka dei kaba sngewsih ïa ka District hi baroh kawei, kumta ngi kwah ba kan nym don ka jingñiew shiliang khmat hynrei kino-kino kiba lah ban wan shakhmat ha ki jingthoh eksam kita ki dei ban ïoh ïa ka kam, ym dei ba tang ba ki dei ki khun jongno jongno ki dei kiba don jingïadei badno badno kin ïoh ïa ka kam hynrei kita kiba lah kin ïoh ïa ka hok ka jong ki,” ong Dr. Juristman.
U Bah Golden Nonglong, uwei na ki riew rangbah ka thaiñ Nongstoiñ ha kajuh ka por kum u dkhot EC ka VPP West Khasi Hills u la ong, ka jingthungkam thungjam kam dei ban long kum ka khyrdop lane ka gate nongkynti jongno re jongno ha kaba u lah ban plie katba mon ïa uba kwah lane khang ïa uba kwah.
U la ong ruh ba ka kam DSC kam dei ka khyrdop jongno jongno, na kata ka daw ka VPP ka leit ban ïakynduh ïa ka DC ka long da ka jingthmu ba ka ïoh kam ïoh jam, ka thungkam thungjam ka dei ban ïaid da ka lynti kaba beit.
