Shillong, Ïaïong 01
U Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar Jylla kan pynbor na bynta ka Special Intensive Revision (SIR) haba ïadei bad ka thup kyrteng ki nongthep ‘vote’ katba ka dang khmih bniah ïa ki jingdawa ban pynkylla ïa ka ‘Constitution (Scheduled Tribes) Order, 1950’ ban pyrkhing ïa ki jingmyntoi tang ïa ki ‘riewlum trai-ri jong ka Jylla.
Haba kren sha ki lad pathai khubor, u Conrad u la ong ba ka Jylla ka kyrshan pura ïa ka SIR ban pynkhuid ïa ka thup kyrteng ki nongthep ‘vote’ na ki kyrteng be-aiñ.
“Kum ka Sorkar Jylla, ngi sngew dei eh ban pyntreikam ïa ka SIR bad ngi kyrshan ïa kane bad ngin sa peit ynda la dei ka por, ngi don ha ka jingïakren bad ka Sorkar India kumjuh ka Election Commission of India – ka la pynsngew hynrei ngim don ïa ka tarik kaba tikna bad ka rukom treikam kaba tikna hynrei ka long kaei-kaei kaba hap ban leh,” u la ong.
Haba kylli halor ka jingdawa, u Conrad u la ong, “Ngi la kren shai bad ngin pynshong nongrim katkum ki kyndon kiba la bud ha baroh ki ADC. Ngin sa peit bniah ïa baroh ki kyndon ka Riti-Synshar hynrei ngi kren shai ba kan don la ka jong ka thup kyrteng ki nongthep ‘vote’.”
Halor ki jingdawa ban wanrah jingkylla ha ka ‘ST Order’ – ban pyrkhing ïa ka jingithuh jong ki Scheduled Tribe ha ki Autonomous District Council tang ïa ki jaidbynriew trai-ri trai-muluk, u la ong ba ka Sorkar kam pat shym la khmih bniah ïa kane ka bynta.
“Kata ka bynta ngim pat shym la peit bniah – nga mut ban ong ba ngin sa khmih bniah ïa kata ka bynta naba ngam pat ïohi haduh mynta. Nga hap ban peit shuwa bad sngewthuh kaei ka jingkdew jong ka,” la ong u Conrad.
Kane ka la wan shisngi hadien ba ka Confederation of Meghalaya Social Organizations (CoMSO) ka la dawa na ka Sorkar Pdeng bad Sorkar Jylla ban pyntreikam ïa ka SIR bad ban pynkylla ïa ka ‘ST Order’, da kaba kynthoh ba ki 53-54 tylli ki jaidbynriew ba la lum thup na ka bynta ka Meghalaya ki kynthup ïa ki jaidbynriew na kiwei pat ki Jylla ka Thaiñ Shatei Lam Mihngi, kaba ailad ïa ki ban thied jaka, ban ïakhun ilekshon, ban khaïi-pateng ha ki jaka ‘riewlum khlem kano-kano ka jingpyrkhing.
