Islamabad, Lber:
Katkum ki khubor, la ong ba u Myntri ka tnat kam bar ri jong ka Pakistan, u Ishaq Dar, u la leit jurip sha China ha kane ka sien, katba ka thma jong ka Iran ka la nang ïaid shakhmat shaduh ka taïew kaba 5 naduh ba la sdang ia ka ha kine ki khyndiat taïew ba la dep.
Katei ka jingleit jurip jong u Dar sha China ha ka Sngi Ba-ar, ka long hadien ka jingkhot sngewbha jong u Myntri kam bar ri ka China, u Wang Yi, katkum ba la pynbna da ka tnat kam bar ri jong ka Pakistan ha ki rynsan pathai khubor. Kumta, la ngeit ba kine ki 2 ngut ki Myntri kam bar ri jong kitei ki arliang manla, kin ioh ban iakren halor ka jinglong- jingman jong kitei ki ri bad kumjuh ruh haba iadei bad ka lad jong ka jingiatreilang hapdeng jongki, khamtam ha kine ki sngi ba ka khaïi- ka pateng ka la kulmar namar jong ki thma bad jingiakynad jong kawei ka ri sha kawei pat.
Ka tnat kam bar ri jong ka China kam shym la jubab mardor halor ka jingkyrpad ban ai jingmut halor katei ka jingleit jngoh.
Ka Pakistan bad ka China ki la kyntu ia ka jingiakren hapdeng ka Iran bad ka US ban trei ban pynkut noh ia ka thma kaba la pynthut ia ki iew ki hat jong ka pyrthei bad phah ia ka dor jong ka umphniang ban kiew. Ka Pakistan ka la mih kum ka nongïalehkai ba kongsan ha kaba wad ïa ka jingïasuk, da kaba pyndonkam ïa ka jingïadei bad baroh arngut u Trump bad ka jingïadei kaba la slem bha bad ka Iran.
Ka Pakistan ka la pdiang sngewbha ïa ki myntri bar ri jong ka Saudi Arabia, Turkey bad Egypt ha ka sngi U Blei ban ïakren halor ka jingïakynad ha Middle East bad ka la ong ba ka Islamabad ka long kaba la pynkhreh ban pynsuk ïa ka jingïakren ïasuk hapdeng ka US bad ka Iran ha kine ki sngi ban wan.
Ha ka jingïakren lyngba ka telebishon ha ka Sngi U Blei, u Dar u la ong, “Ka Pakistan ka dap da ka jingkmen kaba khraw ba baroh arliang ka Iran bad ka US ki la pynpaw ïa ka jingshaniah ha ka Pakistan ban pynsuk ïa ka jingïakren jong ki.”
“Ka Pakistan kan sa ïoh ïa ka burom ban pdiang bad pynsuk ïa ki jingïakren kiba don jingmut hapdeng ki arliang mamla ha ki sngi ban wan na ka bynta ka jingpynbeit kaba pura ïa ka jingïakynad kaba dang ïaid shakhmat,” u la bynrap.
Ka Mao Ning, ka nongaiktien jong ka tnat bar ri jong ka China, ka la ong ha ka X post ba “ka China ka ïaroh bad kyrshan ïa ka jingpyrshang jong ka Pakistan ban pynjem ïa ka jingïakynad bad ka long kaba la khreh ban kyntiew ïa ka jingïadei bad ka jingïatreilang bad ka Pakistan bad kiwei kiwei ban ïatreilang na ka bynta ka jingsangeh thma bad ka jingsuk ha kane ka thaiñ.”
Hynrei u President Donald Trump u la ai ïa ki dak kiba ïapyrshah halor ki sienjam ba hadien jong ka US na ka bynta ka thma. U la ong ba ka US ka la dep ban ïakren – beit bad lyngba ki nongpynïasuk – bad ka Iran, katba ka dang pyrkhat paidbah ruh ban pynïar ïa ka jingïakhih shipai. Ka Iran ka la kyntait bunsien ba ka dang ïakren bad ka US.
Ka Pakistan ka don ka jingïateh kular ban ïada mar kylliang bad ka Saudi Arabia, kaba la shah thombor ha ki jinghiar thma jong ka Iran.
Ka Islamabad ka don ruh ka jingangnud ban wad ia ka lad ban pynbeit ia ka jingialeh khnang ban lait na ka jingshah rong noh ha ka jingialeh.
