Shillong, Ïaïong 01
Ki katto katne ngut ki nongshong shnong jong ka Shnat Raid Tynring ki la ong ba ka jingjied Sordar Shnat Raid Tynring tang da ki 17 kur, ka la pynsuba ba don eiei sha lyndet bad ki la kynnoh ba ka la don ka jingïadie ïathied jaka be-aiñ.
Ka Kong Phriensibon Kharmuti haba kren sha ki nongthoh khubor ha ka sngi Balang ka la pynpaw ka jingpyrshah haba ïadei ka jingjied Sordar dang tang da ki 17 kur, namar ba naduh mynshwa ka hukum ka ïingbishar High Court kaba la pynmih ha ka 7 tarik Nohprah 2018, kaba la shah ïa ki nongshong shnong shynrang ne kynthei kiba la 18 snem shaneng ki lah ban shimbynta ha ka ilekshon jied ïa u Sordar.
Shuh-shuh ka la ong ba kane ka jingjied Sordar tang da ki 17 kur ka dei kaba la jia ha ka sien ba nyngkong eh ha ka histori jong ka Shnat Raid bad kaba la pynlyngngoh ïa ki nongshong shnong namar kata ka la pynpaw ïa ka pyrshah jur ba ki 17 kur kin long ki nongpeit nong khmih hapoh jong ka Shnat Raid Tynring bad kyntu ruh ïa u Syiem kumjuh ka KHADC ban shimkhia ban pynbeit noh ïa kane ka kam.
Haba ïadei ka jingkynnoh ba ka la don ka jingdie jaka be-aiñ u Samla Oshalson Nongbri u la pan da ka RTI na ka ophis jong ka New Shillong Township Development Agency (NSTDA) kaba u la ïoh jubab ha ka 28 tarik u Nailar 2025, kaba batai ba la die ïa ka jaka ba 50 akar tam ha ka dor T. 250 sqft ha u riewshimet u Bah Stening June Lyngdoh Mawnai ha ka 24 tarik u Ïaiong 2022.
Shuh-shuh ki la kynnoh bad pynpaw ïa ka jinglyngngoh ba ka pisa ba la ïoh na kaba die ïa ka jaka ba 50 akar la sam tang mar 2 lak tam sha kumba 500 eiei ki longïing, katba ha ka jingshisha ki nongshong ki dei ban ïoh kumba 10 lak eiei bad kaba la pynlyngngoh shuh shuh ka long ba la die ïa katei ka jaka ha ka snem 2022 katba la sam ïa ka pisa pat ha ka snem 2025 shuwa jong ka jingjied ïa u Sordar jong ka Shnat Raid.
Nalor jong kata, katkum ka RTI ba la lap, u Bah Wardington Nongrum Sordar jong ka Shnat Raid Tynring u la die ïa sa kawei pat ka jaka kaba ha ka jingheh kumba 35 akar eiei bad ki la kynnoh ruh ba ïa kane u la die khlem ka jingmynjur jong ki paidbah bad khlem da don kano-kano ka NOC na u Syiem lane na ka KHADC.
Kine ki nongshong shnong ki la pynpaw ba ki la rai ban phah jingthoh sha District Council haba ïadei kane ka kam bad ban ïaid ruh da ki lynti jong ka aiñ.
