Agartala, ïaïong:
Ka kynhun Enforcement Directorate (ED) ka la mudui lai tylli ki mukotduma hapoh ka kyndon Prevention of Money Laundering Act (PMLA), 2002 pyrshah ïa ki 14 ngut ki briew kiba shah kynnoh nongpynkheiñ aiñ ha Tripura ha kaba ïadei bad ki kam khaïi tuh ïa ki jingdih pynbuaid bad ki kam kamai ïa ka spah bymhok, la ïathuh ki heh sorkar ha ka 31 tarik u Lber.
Ïa kine ki jingujor la ai ha khmat ka Special Court (PMLA) ha West Tripura da ka ophis jong ka Agartala Sub Zonal jong ka kynhun ED, katkum ki kyndon ba ïadei jong ka aiñ.
Katkum ka jingong jong ka tnad, ki jingdon jingem kiba shongdor kumba T.6.85 klur, kiba lah ban pynkhih bad ki bymlah ban pynkhih, la kurup, lane la bat shipor ha kaba ïadei bad ki mukotduma. Ïa kine ki jingdon jingem la ithuh kum ki jingmih na ki kam runar ba la pynmih lyngba ki kam khaïi drok.
Ki mukotduma ki mih na ki kam runar ba la mudui hapoh ka Narcotic Drugs and Psychotropic Substances (NDPS) Act,1985, kiba kynthup ïa ki kynhun ba la pynbeit ryntih kiba ïatreilang ha ka jingkhaïi drok bad ka jingpynkhuid ïa ki pisa ba la ïohlum be-aiñ.
Ha ka mukotduma kaba nyngkong, ka kynhun ED ka la sdang ïa ka jingtohkit jong ka da kaba pynshong nongrim ha ka ejahar kaba la ujor ha Jirania Police Station ha West Tripura pyrshah ïa u Litan Saha bad kiwei kiwei. Ha ka jingtohkit la lap ba la kynnoh donkti ha ka jingkhaïi ïa ki dawai jyrhoh kiba don ïa ka Codeine, kynthup ïa ka jingkurup jong ki pulit ïa ki 9,590 tylli ki bilor. Ka tnad ka la pynpaw ba uba shah kynnoh u la pyndonkam da ka kompeni pynpoi mar ban kit ïa ki mar ba la khang pyrshah bad ban pynkylla ïa ka pisa lyngba ki bank Account ba bun jait.
Ka mukotduma kaba ar ka dei kaba ïadei bad ka jingïoh kurup ïa u drok uba bun bha, ba kynthup ïa 1,352 kg u Ganja ba la tyrkhong ha North Tripura’s Panisagar bad 14,400 tylli ki bilor dawai jyrhoh Phensedyl ha Khowai distrik. Ka ED ka la kynnoh ba kiba shah kynnoh ki dei shi bynta jong ka kynhun ba la pynbeit ryntih hapdeng ki jylla kaba kit drok sha kiwei pat ki jylla, bad ba ïa ka pisa ba la ïoh be-aiñ la thied ïa ki jingdon jingem.
Ka mukotduma kaba lai ka dei kaba ïadei bad bun tylli ki ejahar ba la mudui hapdeng u snem 2020 bad 2025 ha kaba ïadei bad ka jingkurup Ganja kaba bun ha kylleng ka jylla. Ki jingtohkit ki la pyni ïa ka jingdon jong ka kynhun khaïi tuh kaba la pynbeit bha, ha kaba la kynnoh ba ïa ka jingmih la pynpoi lyngba ki Bank, ki lad kiba long da ka lynti kaba beaiñ, bad ki jingbei tyngka ha ki kam khaïi bad ki jingdon jingem.
Ka kynhun ED ka la ong ba ka jingtohkit ka dang ïaid shakhmat ban lap ïa kiwei pat ki jingdon jingeh bad ki briew kiba don jingïadei halor kine ki jingjia.
