Shillong, Ïaïong 01
Ka Kynhun Myntri ka Jylla ka la mynjur ïa ka skhim ‘Provident Fund’ kaba la sahteng la slem bah na ka bynta ki nongtrei jong ki skul bad kolej ki bym dei jong ka Sorkar kiba ïoh ïa ki ‘Deficit Grant’ na ka Jylla.
Haba pyntip ïa kane hadien ba pynïaid ïa ka jingïalang ha ka Sngi Balang, u Myntri Rangbah ka Jylla, u Conrad K. Sangma u la ong, “(Ngi la mynjur ïa ka) jingpyntreikam jong ka ‘Meghalaya Non-Government Schools and College Employees Centralized Provident Funds Scheme 2026’.”
“Kumba phi tip, ki don shibun ki nongtrei jong ki skul bad ki kolej bym dei Sorkar katkum ka aiñ ba ïadei – la don katto-katne ki jingsynñiang hynrei ka Sorkar kam shym la don ïa ka skhim kaba biang ban pyntreikam ïa kane ka jingsynñiang ba kyrpang. Mynta ka sngi, ngi la pynbeit khatduh ïa kata ka skhim ba kyrpang bad ka Kynhun Myntri ka la mynjur ïa ka. Shisien ba la mynjur ïa kane ka skhim, katkum ka skhim, ki nongtrei jong ki skul bad ki kolej bym dei Sorkar kin sa ïoh ïa ki jingmyntoi jong ka ‘Provident Fund’.”
U la ong ba kane ka sienjam ka treikam khamtam ïa ki nonghikai ‘Deficit’ – ki nongtrei ha ki skul bad ki kolej shimet kiba la bei pisa (shibynta) da ki song jingïarap pisa ka Sorkar, kum ka St Anthony’s College, St Edmund’s College, Shillong College bad kiwei-kiwei.
“Kine ki kolej kiba la don kiba ka Sorkar ka ai tulop ha ka liang ki ‘Deficit Grant'”, la ong u Conrad.
Ïa ki jingsynñiang na kito ki nongtrei la ot katkum ka aiñ ba la ïoh pateng na Assam bad ba la pdiang da ka Meghalaya, hynrei ym shym la don kano-kano ka skhim ban pynïaid biang ïa ka pisa sha ki ynda ki la shongthait.
“Ka Sorkar ha kata ka por kam shym la wanrah ïa ka skhim halor kumno ban ai ïa kane ka jingsynñiang sha ki nongtrei jong kine ki kolej bad ki skul ynda ki la shongthait. Kumta, mynta, kaei kaba ngi la leh ka long ba ngi la mynjur ïa kata ka skhim ba dei ha kane ka rukom yn ai bad kata ka dei kaei-kaei kaba sahteng la slem bah bad kata ka dei kaba ngi la leh,” u la bynrap.
U Myntri Rangbah u la ong ba um don ïa ka jingkheiñ kaba tikna halor ka jingdon jong ki nongïoh jingmyntoi, hynrei ka skhim mynta kan pynbiang ïa ka rukom kaba beit ryntih ban pyllait ïa ki jingsynñiang kiba la lum lang.
Haba kylli shaphang ka jingktah ha ka liang ka pisa-tyngka, u la pynshai: “Em, ki jingsynñiang ki la dep ban leh lypa, te kumta ka long tang ka jingkylli mynta ban pyllait ïa ka sha ki bad kan hap ban don ka jingpynbeit ryntih bad ka skhim halor ka nongrim ha kaba yn sam ïa ka.”
