Jowai, Ïaïong 01
Ka Goodwill Mupliang SC ka la long ba la pynkhreh ban ïakhun pyrshah ïa ka The Legends (Lissi Pearl) ha ka semi-final kaba nyngkong jong ka lympung ïalehkai District Cricket League 2026 ba la pynïaid da ka West Jaiñtia Hills District Cricket Association (WJHDA), mynta ka sngi Palei ha madan Khliehtyrshi Mini Stadium naduh ka por 9 baje mynstep.
Ka jingïoh rung ka The Legends sha ka semi final ka la wan hadien ba ka la lah ban pynliem noh ïa ka Wahïajer SC da 47 run ha ka jingïalehkai quarter final kaba khatduh kaba la long ha ka 31 tarik Lber.
Ha katei ka jingïakhun ka The Legends ka la kam trai ban tied nyngkong, ha kaba ka la kamai 197 run ha ki 35 over bad shah pynhap 8 wiket. U Shaniahlang Ryngkhlem u la long u nongtied uba kynsai ha kaba u la ïoh ban khyrwit ïa ka shiteng spah kaba 69 run na ki 42 bol abd u Dachange Mi Phawa u la ïoh 47 run na ki 54 bol. Katba na ka liang ki nongkawang bol ka Wahïajer, u Janai Talang ula khur 3 wiket.
Ka Wahïajer haba wan beh ïa ka thong, ka la kamai tang 150 run ha ki 29.5 over bad shah pynkhyllem baroh ki nongtied. U Kitboklang Shylla u la tied 41 run na ki 40 bol bad u Jeremaia Mukhim u la ïoh 21 run na ki 22 bol. Katba ki nongkawang bol ka The Legends (Lissi Pearl), u Conrad Sana ula khur 5 wiket ha ki 6.5 over bad u Rainbow Phawa u la ïoh 2 wiket ha ki 7 over. Ïa ka nam Man of the Match la ïoh da u Conrad Sana.
Haba phai sha ka Goodwill Mupliang ka la jop da 5 wiket ïa ka Young Lads ha kawei pat ka jingïakhun quarter final kaba la long ha ka 26 tarik u Lber.
