Chennai, ïaïong:
U Secretary jong ka kynhun seng ki samla jong ka seng DMK bad u Symbud Myntri Rangbah u Udhayanidhi Stalin ha ka lah sngi U Blei u la kynthoh ïa u General Secretary ka AIADMK u Edappadi K Palaniswami namar ba u la sdang ïa ka jingïalap elekshon jong u na Mylapore, ka jaka ba la ïakhun da ka BJP kum shi bynta jong ka kynhun NDA.
Ki nongïalam kiba don bynta ban ai jingmut ïa u [Palaniswami] ki dei u Narendra Modi bad u Amit Shah, katba ki jong ngi ki dei u Periyar, Anna bad u Kalaignar, u la ong.
U Udhayanidhi, u la sdang ïa ka jingïalang elekshon jong u, ha ka lah sngi U Blei, hadien ba u la ai syntiew ïa u Myntri Rangbah barim ka jylla, u C.N. Annadurai, ha Anna Memorial House, ha Chinna Kanchipuram.
“Ngim tieng ban ïakynduh ïa ki paidbah. Ngi la pyndep ïa ki jingkular jong ngi, ki paidbah ka Tamil Nadu ki khmih lynti ban jied biang ïa ka DMK. Ki dei kiba tip ïa ka saiñ pyrthei bad ki sngewthuh ïa kaei kaba ka BJP bad ka Delhi ki leh ïa ka Tamil Nadu jong ngi”, la ong u Myntri Rangbah.
Hadien kane, u la ïalap elekshon ha Theradi hajan ka ïew Rajaji ha Kanchipuram, ha kaba u la kyrshan ïa ki kyrtong jong ka DMK, u Nithya Sukumar (Kancheepuram) bad u Sundar (Uthiramerur). U Udhaya u la pynpaw biang ba ka DMK ka dang long ka jingïakhih kaba ïatreilang beit bad ki paidbah.
Haba pynpaw ïa ka jingshaniah ha ka jingkyrmen jong ka seng, u la ong ba ki khmat kiba kmen ha ki paidbah ki pynpaw ba ki briew ki la dep rai ïa ka jingmih jong ka elekshon.
Ki la don palat 400 ngut ki nongbud jong ka seng DMK, hapoh ka jingïalam jong u nongkitkam ka seng M Karuna, ki la pynïasoh ïalade sha ka seng AIADMK ha ka step jong ka lah sngi U Blei, ha ka jingïadon lang u VV Rajan Chellappa, u nongmihkhmat barim jong ka Madurai bad u kyrtong jong ka seng AIADMK na Thiruparankundram konstitwensi.
Katkum ki tyllong khubor, la kynnoh ba ki nongbud ka DMK ki la sngewkhuslai halor ki rukom pyntreikam hapoh ka seng bad ki la sngew ba ym shym la pdiang ïa ki jingeh jong ki. Namar ba kim shym la ïoh jubab ei ei na ki nongïalam ka DMK, ki la rai ban ïasoh bad ka seng ka liang pyrshah, la bynrap shuh shuh ki tyllong khubor.
