Washington, Lber:
Katkum ki khubor, la ong ba ka Shelly Kittleson, kaba long ka nongthoh khubor kaba la ioh pdiang khusnam jong ka US, ka la shah rahbor ha Iraq, ha ki briew bym don jingithuh na Baghdad ha ka Sngi Ba-ar.
La ong ba ki bor pyniaid ka US ki la dep iohsngew teng ia ki jingbyrngem rahbor ia katei ka nongthoh khubor bad ki la dep maham ruh ia ka, ba kan ym leit sha Iraq namar ki jingma kiba ap ia ka jingim jongka.
Kumjuh ruh na ka liang ka tnat kam poh iing jong ka Iraq, ka la pyntikna halor ka jingshah rahbor jong katei ka nongthoh khubor jong ka US, watla katta, kim pat pyntikna pat ia ka kyrteng ne kim pat shym la pynithuh ia katei ka nongthoh khubor na ka liang jongki.
Arngut ki heh pahara jong ka Iraq, kiba la kren khlem da kwah ban pynpaw kyrteng namar ba kim shym la shah ban kren paidbah halor katei ka kam, ki la ong ba katei ka nongthoh khubor kaba la shah rahbor, ka dei ka kynthei kaba don ia ka jinglong nongshong shnong jong ka US. Ki la iathuh ba ki don ar tylli ki kali kiba donkti ha katei ka jingshah rahbor, kawei na kitei ka la tynrah bad la kem ia ka, katba kawei pat ka kali, ka la phet krad noh na katei ka jaka ryngkat bad utei u nongthoh khubor, kaba leit sha ka thain shatei jong ka Baghdad, ong ka khubor jong ka Associated Press.
