Shillong, Ïaïong 01
U Myntri Rangbah ka Jylla, u Conrad K. Sangma ha ka Sngi Balang u la pynbna ba shen yn sa pyndep noh ïa ka jingtei jong ka LPG ‘Bottling Plant’ kaba la sahteng la slem bah ha Meghalaya.
Haba kren sha ki lad pathai khubor, u Conrad u la ong ba ka jingtei mynta ka la ïaid shaid-shaid shakhmat.
“Ka dei kaei-kaei kaba la sahkut la slem bah bad dei kane ka Sorkar kaba la shim ïa ka rai, pynbiang ïa ka jaka bad ka jingtei ka la sdang. Hooid, ka paw shai ba baroh kiei-kiei ki shim por, phim lah ban khmih lynti ba ïa ka jingtei yn pyndep noh mar-mar hynrei ka kam ka ïaid sted bha. Kumta, ngi khmih lynti ba shen (yn sa pyndep) kloi ïa ka,” u la ong.
“La dei ban leh la slem bah ïa kane hynrei kata kam pher, ngi la shim ïa ka rai, ngi la pynbiang ïa ka jaka bad mynta ngi la poi ha ka khyllipmat ba ngi dei ban lah ban pyndep ïa ka,” u la ong.
Na ka liang u Myntri Rangbah u la pyntip ruh ba ka jingpynpoi ïa ki ‘Commercial’ LPG ka dang don hapdeng ka jingeh ha ka ri baroh kawei, hynrei ka jingpyndonkam lyngba ki ‘Domestic’ ha ka Jylla ka dang ïaid-beit ïaid-ryntih ha ryngkat ki jingduna kiba tang khyndiat eh.
“Haba phai sha ka jingpyndonkam LPG ha ïing, ngi dang pynbiang, ki don katto-katne ki jingduna hynrei ym katta-katta,” la ong u Conrad.
“Hynrei haba ïadei bad ka ‘Commercial’ LPG, ka don ka jingduna ha kylleng ka ri, kumta ka Sorkar ka la kyntiew sha ka 70% na ka dor ba hashuwa kaba la don lypa na bynta baroh ki Jylla. La pynkiew na ka 20% sha ka 70% hynrei ngim pat sngewthuh ïa ka jingktah ba shisha jong kata. Ngi khmih lynti ba ha ki sngi ban wan ba ka jingpynbiang kan nang kiew,” u la ong.
Shuh shuh u la bynrap, “Kine ki long khyndiat na ka jingeh namar kumba phi tip, ba jan 90% na ka jingdonkam LPG kaba don, ka wan na kane ka thaiñ bad ka ïaid lyngba ka ‘Strait of Hormuz’ bad kumta, ki jingeh ki don,” u la ong.
“Hynrei ha kajuh ka por, ka Sorkar India ka dang pynbiang ïa ki lad jingpynbeit ha ki kyrdan bapher-bapher ban pynduna ïa ka jingeh kaba ki paidbah ki ïakynduh,” u la ong.
