Shillong, Ïaiong 03
Ka lympung ‘Khelo India Tribal Games 2026’ kaba la sdang naduh ka 25 u Lber 2026 ka la poi noh sha kaba kut ha ka 03 tarik u Ïaiong kaba la long ha Chhattisgarh.
Halor kane ka lympung ïalehkai kaba la neh 10 sngi lynter kaba la poi noh sha kaba kut, ka President ka ri India ka Droupadi Murmu ka la pynpaw shibun kiei-kiei halor kane ka bynta.
Ka Droupadi Murmu ka la pynpaw ka jingïaroh ïa ka dustur ka jingim ki riewlum kaba la ai mynsiem bad kyntiew shibun ha ki kam ïalehkai, ka pynpaw ba naduh ki khynnah ki la don lypa ïa ka sap ïalehkai ha ki rukom leh tynrai bapher-bapher bad ki lehkai shitrhem watla ki lehkai khlem da phong ki juti ne ki jersey. Kumjuh ruh ka la pynpaw halor ki kam lehkai jngi um bad kumno mynta ba lyngba kine ki sap ba ki don ki la nang ban pynbha shuh shuh lyngba ki jingïarap ha ki kam ïalehkai khamtam kum kane ka lympung kaba mynta.
Ka la pynkynmaw ruh ïa ka Anjali Munda, ka khun kynthei ba dang 15 snem ka rta na Jajpur, Odisha ka la ai mynsiem ïa ki samla jong ka ri baroh kawei da kaba khur haduh lai tylli ki takma ksiar ha ka sngi nyngkong jong ka jingplie ïa ka ‘Khelo India Tribal Games 2026’.
Ka la pynpaw ruh ba ki jaitbynriew riewlum ki don ka jingsngewtynnad tynrai ha ka jingsiatkhnam. Ha ka snem 1855, ka jaitbynriew Santhal ka la pynlong ïa ka jingïaleh kaba jur pyrshah ïa ka jingshah ñionbeiñ na ki shipai phareng. Ka la pynpaw ba la seng ruh ïa ki ‘Sports Excellence Centers’ ha ki Eklavya Model Residential School kaba la plie lad ïa ki khynnah ban ïoh ïa ki kam ïalehkai bad kiba katkum ka juk mynta. Halor ka kam kum ka President ka Ri ka la ïathuh ba ka la seng skul na bynta ki longïing kiba duk bad ka la buh ruh ïa ka jingai jinghikai ha ka jingïalehkai siatkhnam ha ka phyllaw jong ka skul.
Ha kaba ïadei bad kane, ka campaign ‘Khelo India’, kaba la sdang da ka Sorkar Pdeng ha ryngkat ki jingïatreilang bad ki Sorkar Jylla bad ki katto katne ki seng jong ki kam ïalehkai naduh u snem 2018, ka la wanrah ïa ki jingkylla kiba bha.
Haduh katto katne snem mynshuwa, ki jingshakri ki kam ïalehkai ha ka Ri ki don tang ha ki nongbah kiba heh, ki Sports Academy bad ki jaka ai jinghikai kim shym la don ha ki jaka riewlum. Mynta, naduh ka jingphai khmat ba kyrpang ha ki kam ïalehkai jong ki khynnah ha ki Eklavya Model Residential School haduh ki sienjam kum ka ‘Khelo India Tribal Games’, katto katne ki kam ki dang ïaid shakhmat ban ai jinghikai ïa ki nongïalehkai riewlum bad ban kyntiew ïa ka jingtbit hapdeng jong ki.
Ka la pynpaw ruh ba lyngba kane ka lympung ‘Khelo India Tribal Games 2026’ ka la kyntiew shibun na bynta ki riewlum bad kiwei kiwei kum na ki Union Territory ha ka jingpyrshang jong ki.
Ka la pynkynmaw ba ka India ka la ïoh takma ksiar kaba nyngkong eh ha ka Olympic ha ka hockey ha u snem 1928. Ki nongïalehkai na ki jaitbynriew riewlum ki don ka bynta kaba kongsan ha kata ka jingjop. Naduh katei ka por, ki nongïalehkai hockey ba pawnam kum u Dilip Tirkey, u Subodh Lakra, bad ka Salima Tete ki la bteng ban kyntiew ïa ki kynhun ïalehkai kynthei bad shynrang jong ka India da ka sap jong ki.
Haba pynkut halor ka jingkren jong ka ka la pynpaw ba ka sap ïalehkai jong ki samla, kynthup ïa ki jaitbynriew riewlum, ka pynlong ïa ka spah ha ka imlang sahlang kaba kordor bha na ka bynta ka Ri. “Nga ngeit skhem ba, da kaba pyndonkam hok ïa kane ka spah kaba kordor, ka Ri jong ngi kan buh ïa ki nuksa kiba bun jong ka jingtbit ha ka kam ïalehkai. Da kane ka jingsngew skhem, ka khubor jong nga ka long: Khelo India! Khoob Khelo India!” (“Play India! Play More/Well India!”), la ong ka President.
