Guwahati, ïaïong:
U nongïalam jong ka seng Congress u Rahul Gandhi, ha ka sngi Palei, u la pyllait paidbah ïa ka mat treikam jong ka seng, na ka bynta ka elekshon sha ka ïing dorbar thawaiñ jong ka Assam, ha kaba la pynleit jingmut ha ki 11 tylli ki bynta, kum ka jingsynshar, ka jingithuh ithaw bad ka koit ka khiah.
Ha ka jingïalang elekshon hangne, u Gandhi, u President ka seng Congress ha Assam u Gaurav Gogoi bad kiwei kiwei ki heh nongïalam ki la plie paidbah ïa ki mat treikam jong ka seng.
Ki 11 tylli ki rai ki la saphriang ha ki bynta kum ka jingsynshar, ka jingithuh, ka koit ka khiah, ka jingpynroi ïa ki jingtei, ka jingpynmih karkhana, ka rep ka riang, ka jingpynroi ïa ki nongkyndong bad ki sor, ka jingkylla ka suiñbneng bad ka jingshngaiñ ha Assam.
Ka Congress ka la dep ban pyllait “san tylli ki jingkular” ha ka 29 tarik u Lber ha ka jingwan jngoh jong u heh duh jong ka seng u Mallikarjun Kharge, da kaba pynleit jingmut bha halor ka bha ka miat jong ki kynthei, ka koit ka khiah na ka bynta baroh, ka hok halor ka khyndew ka shyiap bad ka jingbishar bahok halor ka jingjia jong ka jingïap u Zubeen Garg.
Kine ki kynthup ïa ka jingai pisa man u bnai sha ki kynthei, ha ryngkat ka jingïarap sa T. 50,000 sha ki kynthei kiba kwah ban seng ne pynïar ïa ka kam, T. 25 lak ka jingmyntoi ka ban leit na ka bynta ka Health Insurance na ka bynta kawei ka longïing, ka jingkular ban ïoh ïa ka hok ha ka mukotduma hapoh 100 sngi, ki kot dulir na ka bynta 10 lak ki nongshong shnong “Khilonjia” bad T. 1,250 kum ka jingïarap kaba man u bnai sha ki tymmen ki kro.
Ka jingthep vote na ka bynta ka Ïingdorbar Assam kaba don 126 ngut ki dkhot kan long ha ka 9 tarik, Ïaïong, katba ka jingñiew bote kan long ha ka 4 tarik, Jymmang.
