Shillong, Ïaiong 03
Ka lympung lehkai 5th District League T20 Cricket Tournament 2026 jong ka East Khasi Hills Cricket Association ka la bteng da ka jingïalehkai Semi Final 1 jong ka sngi ba 27 bad ka jingïalehkai (Match) No. 51 kaba la long hapdeng ka Friends United pyrshah ïa ka Sohra Combine.
Na ka jinghap noh u slap la pynlyngkot noh ïa ka jingïalehkai tang ha ki 12 over, ha ka jingkynting pisa la kam trai da ka Sohra Combine kaba la jied ban tied hadien. Ka Friends United ka la ïoh 114 ron, u E. Nathan A Diengdoh u la kamai 42 ron bad u Darius Rani u la khur 3 tylli ki wiket.
Ha kaba beh ïa ka thong ka Sohra Combine ka la ïoh tang 102 ron, u Jona Lyngdoh Nonglait u la ïoh 30 ron bad u Nangkiewkor Moore u la pynhap 3 wiket.
Ha kaba kut ka jingïalehkai ka Friends United ka la jop noh da 12 ron bad ïa ka nam ‘Player of the Match’ la ïoh da u Nangkiewkor Moore Don.
Ha ka jingïalehkai Semi Final 2 ka Match No. 52, ka Cricket Smit ka la ïakhun pyrshah ïa ka Mawphlang CC. Ha kaba kynting pisa ka Mawphlang CC ka la ïoh ban kam trai bad kala ai lad ïa ka Cricket Smit ban tied ha shuwa kaba la ïoh 93 ron. U Pynkhrawbok Thabah u la ïoh 34 ron katba u Bankit u la khur 2 wiket.
Ha ka pali beh ïa ka thong ka Mawphrang CC ka la ïoh tang 83 ron, u Kyrshanlang Lyngdoh u la kamai 33 ron katba u Pynkhrawbok Thabah u la khur 2 wiket.
Ka Cricket Smit ka la jop noh da 10 ron haba kut ka jingïalehkai bad ïa ka nam ‘Player of the Match’ la ïoh da u Pynkhrawbok Thabah.
Ka jingïalehkai Final ha ka 4 tarik Ïaiong 2026 ha ka por 10 baje mynstep kan long hapdeng ka Cricket Smit pyrshah ïa ka Friends United Sohra.
