Shillong, Ïaïong 05
U Bah Sanbor Shullai uba dei u Myntri ka Sorkar Jylla bad ruh u MLA ka 19 South Shillong ha ka sngi Saitjaiñ u la plie paidbah ïa ka surok ‘Mini Bypass’ kaba ïaid nadien jong ka NEFA Secretariat, Cantonment Area kaba la dep ban shna bad pynbit pynbiang da ka tnad PWD.
Ha ka jingplie ïa kane ka surok thymmai kaba jrong 185 meter kaba la tei ha ka jinglut kaba kot sha ka 3 klur 36 lak 18 hajar tyngka bad ïa kaba la pyndep hapoh ka shisnem tam, la ïadon lang ka Rani Jibang kaba dei ka Deputy Resident Commissioner ka Sorkar Arunachal Pradesh, u SE ka tnad PWD Bah A Dkhar, u Executive Engineer ka Shillong Central Division Bah S Lytep, u Additional SP traffic ka East Khasi Hills, lem bad kiwei kiwei ki heh ki hain nalor ki rangbah shnong, nongkitkam shnong bad ki riew paidbah.
Kane ka surok thymmai kan long shisha ka jingïarap ban kham pynduna ka dheng kali ha ka lad ban rung sha Anjalee bad Iew Mawlong, ha kaba ki kali ba ïaid sha thaiñ Rilbong, Upper Shillong ne Garikhana kin rung noh na kane ka surok bad ka ban dei ruh tang ka one-way.
Haba kren kum u kongsan u Bah Sanbor u la ong, “Ïa kane ka skhim la sdang da ka Sorkar MDA hapoh ka jingïalam u Myntri Rangbah ka Jylla u Conrad K Sangma, u Symbud Myntri Rangbah ka Jylla u Bah Prestone Tynsong, bad ma nga hi.”
“Ngi la ïakren ïa kane ka mat na ka por sha ka por, bad ngi la shimkhia lang, bad mynta ka sngi ka jingangnud ka jong ngi ka la wan urlong.”
U Bah Sanbor u la pynpaw ka jingsngewnguh ïa ki paidbah ka 19th South Shillong constituency bad ïa ki heh ophisar jong ka tnad PWD kiba la shimkhia haduh ban da pyndep ïa kane ka surok.
Ka jaka ba shna ïa katei ka projek ka dei jong ka Sorkar Arunachal Pradesh, bad ka Sorkar MDA ka la leit sha ka Sorkar Arunachal Pradesh lyngba ka DRC na ka bynta ban ïoh ban tei ïa katei ka surok.
Na ka liang u Executive Engineer ka Shillong Central Division PWD u Bah S Lytep ha ka jingkren maitphang u la ai ka jingïaroh ïa baroh kiba la don bynta ban pynlong ïa kane ka projek ba kan dep kloi.
U la pynpaw ba kane ka kam ka shimpor kumba shi snem tam bad ha ka por ba sdang ïa kane ka kam, ka tnad PWD ka la ïakynduh shibun ki jingeh, ha kaba la hap ban pynkynriah ïa ka ‘septic tank’ bad namar ba ka jaka ka dei kaba long thliew, la hap ban tei da ka kynroh bad thep ki muri, khnang ba ka um kan ïoh ka lynti ïaid bad ynda la dep kine kiei kiei baroh, la lah ban pynbit pynbiang ïa ka surok.
