Shillong, Ïaiong 05
Katba ka Khasi Students’ Union (KSU) ka dang pynlong ïa ka jingïaid paidbah ha ka sngi ‘Kyrsiew Ri’ ha ki thaiñ Laban kyndit kynsan la don ba kawangmaw ïa ki dkhot bad ki padbah ba ïashimbynta ha kane ka jingïaid paidbah bad na kane ka la jan poi ha ka huri hura.
Ki paidbah ba ïohi ïa kane ki ïathuh ba, ki paidbah ba shim bynta ha ka jingïaid paidbah ‘Kyrsiew Ri’ ki dang ïaid da ka lynti kaba jai-jai, hynrei haba la poi hajan ka Laban Police Station kyndit kynsan la mih u maw na kawei ka ïing, ba thmu ïa ki nong ïashimbynta ha ka rally, kaba la pynlong ïa ki dkhot ka KSU ban sngewbitar bad tam na ujuh u maw ban pynphai kylla ïa katei ka ïing.
Ki trai shnong ki ïathuh “Don ki briew kiba kawang ïa u maw na kawei ka ïing bad ki dkhot ka KSU ki la tam ïa une u juh u maw bad kawang kylla”.
Ki longkmie ka thaiñ ki la pynrem jur ïa kane ka jingkawang maw bad ong ba kane ka lah ban pynbitar ïa ki dkhot ka KSU bad lam sha ka jingkulmar kaba jur. “Ki dkhot ka KSU ki dang ïaid rally hynrei kynsan kynsan u maw ula wan hap na kawei ka ïing. Kino-kino kiba leh ïa kane ki dei ïa ka ban pynrem jur” ki la ong.
Kane ka jingjia ka la pynshong syier ïa ki nongshong shnong jong ka thaiñ, ha kiwei ki bynta jong ka Laban, ki la don ki ïing kiba la shah pynjulor ki jingkhangïit ha kane ka rally, kaba la pynlong hapdeng ka jingpahara kaba pyrkhing bha.
