Mawkyrwat, Ïaïong 05
Ka jingbteng ban leh donbor jong ki dkhot ka Meghalaya Commercial Truck Owners Driver Association (MCTODA) ïa ki trok kit coke jong ka South West Khasi Hills Truck Owners Driver Association (SWKHTODA) kam shym la kut bad ka dang ïaibteng haduh kine ki sngi ha kaba ka la don ka jingshah rahbor ïa ki trok, ka jingshah pynhap ïa ki mar ki mata, ka jingshah thang ruh ïa ki coke bad ka jingbym shngaiñ shuh ïa ki nongñiah trok.
U President ka SWKHD Truck Owners & Driver Association u Bah Skingford Nongbri ha kaba ïadei bad kane ka jingjia u la pynpaw ïa ka jingsngewkhia kaba jur ha kaba ïadei bad ka kam kit coke namar ka jingbym ïa sngewthuh jingmut hapdeng ki ar tylli ki kynhun ha kaba ka ju mih ka huri hura man ka por.
U la ïathuh ruh ba na ka liang ka Association jong ka South West kam ju pynwit ïa ki trok bad ki nongñiah trok jong ka MCTODA hynrei maki pat man ka por ki pynwit.
Ha kane ka sngi la ïoh ban ïakren ïa ki nongñiah trok jong ka South West Khasi Hills Truck Owners & Association ki bym kwah ban pynpaw kyrteng ha kaba ki la ïathuh ba ki ju shah pynwit bad shah byrngem byrsit man ka por ha ki dkhot ka MCTODA kaba la buh ïa ka jingbym shngaiñ shuh ïa ki ha ka ïaid ka ïeng.
Ha ka 2 tarik u Ïaïong, 2026 na ka liang ka SWKH Truck Owner Driver Association ka la ïoh ruh ban lum ïa ka jingïalang ba kyrkieh ha Nongjri bad ha katei ka jingïalang da kawei ka sur ki la kyntait ïa ka jingai jingmut ka MCTODA ban ïaid da u serial number bad ki la rai ba ka jingkit ïa u coke na ki karkhana na Nongjri kan long beit mar sanphew percent khnang ban ïa im lang khamtam ki trai jaka na ka distrik.
