Mawkyrwat, Ïaïong 05
Hadien ka jingïoh pdiang ïa ka shithi ba la shah pynduh noh ïa ka work order katkum ka jingai jingmut jong u MDC ka Mawkyrwat u Bah P Kharjahrin bad ba la soi da u Chief Engineer ka KHADC ha ka 19 tarik u Lber, 2026. Ka Nativity Development Committee kaba hap hapoh ka jingpeit jong ka Parish Pastoral Committee jong ka Parish of Our Parish Mawkyrwat ha ka 4 tarik u Ïaïong, 2026 ka la pynshai paidbah halor katei kam.
Katkum ka jingïathuh u Bah Silvester Syiemlieh, Secretary ka komiti u la ïathuh ba katei ka work order ka dei kaba ai na u MDC barim ka Mawkyrwat u Bah Carness Sohshang ha ka 24 tarik u Kyllalyngkot jong u snem 2025 lyngba ka skhim 15th’ Finance Commission
Untied Grant- 1st’ Instalment jong u snem 2021-22 bad naduh katei ka por ka komiti ka la buddien ïa kane ka kam bad ka la phone ruh ïa u Bah B Syiemlieh, JE uba dei peit ïa ka jingpyntrei ba un wan ban pyni na ka bynta ban sdang noh ïa ka kam hynrei na ka liang u JE u la bthah ban ap shwa namar ka jingbym treikam ka app.
U Bah Silvester ula ïathuh ruh ba ka komiti ka la ap la katto katne bnai bad dei ha u bnai Jymmang, 2025 hadien ba ki la ïoh jingtip ba katei ka app ban leh ïa ka Geotag ka la long, ki la phone biang ïa u JE bad kaba sngewphylla ka long ba u la bthah pynban ban leit ïakynduh shwa ïa u MDC ka Mawkyrwat u Bah P Kharjahrin.
Shuh shuh u la ïathuh ruh ba ka komiti kam shym la shongthait bad ka la leit ban ïakynduh ïa u MDC la lai sien hynrei kaba sngewsih ka long ba ym don kan kano ka jubab kaba shai na u.
Halor katei ka jingbym ïoh jubab, na ka liang ka komiti ha ka 4 tarik u Nohprah, 2025 ka la leit ban ïakynduh noh ïa u CEM ka KHADC u Bah Winston Tony Lyngdoh ban kyrpad ban phah noh ïa ki engineer ban sdang noh ïa ka jingtrei “hynrei kaba sngewsih ka long ba hadien ka jingïakynduh ïa u CEM ruh kam sym la don kano kano ka jingbthah na ka KHADC halor katei ka kam”, la ong u Bah Silvester Syiemlieh.
Kaba pynlyngngoh ka long ba ha ka 26 tarik u Lber, 2026 ka komiti ka la ïoh pdiang ïa ka shithi na ka ophis KHADC kaba dated 19 Lber 2026 kaba address ha u Chairman ka komiti kaba pyntip ba ïa ka work order ban tei ïa ka Market Complex la pynduh noh katkum ka jingai jingmut jong u MDC ka thaiñ bad ba la soi da u Chief Engineer ka KHADC.
Halor katei ka jingpynduh noh na ka liang ka Nativity Development Committee ka kwah ban ïoh jingshai na u MDC bad ka KHADC, ba kaei ka daw ba hap pynduh noh ïa ka work order kaba la ai da ka EC kaba rim bad kaei ka daw kaba ym don kano kano ka jubab halor kitei ki jingthoh bad jingkyrpad jong ka komiti.
