Tura, Ïaïong 05
Ka Executive Committee (EC) jong ka Garo Hills Autonomous District Council (GHADC) kaba la ïalam da u CEM, u Dhormonath Ch. Sangma, ka la pynlong ïa ka jingïalang bad u Deputy Commissioner ka West Garo Hills, u Vibhor Aggarwal ha ka Sngi U Blei ban ïa pyrkhat halor ki katto-katne ki mat pynïaid kam bad mat treikam ba kongsan.
Napdeng ki mat ba la ïakren ki long halor ka jingpynkhreh ïa ki ‘Service Rule’ na ka bynta ki tnad treikam bapher-bapher kiba hap hapoh ka District Council bad ka jingwanrah ïa ka rukom siew ‘Online’ kaba thmu ban pynbha ïa ka jingtreikam bad ka jingkhuid-jingsuba ha ka synshar-khadar.
Haba kren sha ki lad pathai khubor hadien ba la wai ka jingïalang, u CEM u la ong ba ka EC ka la rah ruh ïa ka mat ba ïadei bad ka jingshong shnong be-aiñ ha ki jaka jong ka District Council ha ki thaiñ Chibinang.
Ka komiti ka la rai ban ïaid shakhmat bad ka jingtohkit, bad kino-kino ki briew lada lap ba ki dei ki nongshong shnong be-aiñ yn kyndang bad phah biang ïa ki.
Kumban shu kdew hangne, ka Chibinang ka long kawei na ki jaka kaba shah ktah jur bha ha ka por ba mih ka jingkulmar dang shen halor ka jingïashim bynta jong ki bym dei ‘riewlum ha ka ilekshon GHADC.
Shuh shuh ka EC ka la ïamir-jingmut halor ki jingkynnoh thung kam be-aiñ ha ka por jong CEM bad Deputy CEM barim. La rai ba ïa kiba kum kine ki jingthung kam, yn pynsangeh noh.
Hynrei u CEM u la pynshai ba ki kyrtong kiba la shah thung lyngba ka rukom treikam kaba dei, kynthup ïa kito kiba la seisoh ïa ki ‘Interview’ na ka bynta ki kam ba la pynbna katkum ka rukom ba dei, kin ym shah ktah ha katei ka rai.
Haba batai ïa ki mat ba kongsan jong kane ka EC kaba mynta ha ka por ba pynjlan ïa ka samoi treikam sha ka hynriew bnai, u Sangma u la pynpaw ba yn pyrshang ban shimkhia ïa ki mat kiba sahteng la slem kum ka jingwanrah ïa ka thup kyrteng ki nongthep ‘vote’ kaba la ka jong na ka bynta ka District Council, ka jingpynbeit ryntih ïa ki aiñ ba ïadei bad ka riti-dustur ki Garo, bad ka jingpynbeit pud ïa ki konstitwensi.
