Shillong, Iaïong 05
Ka jingïap ha ki madan madiah na ka jingpyndonkam ïa u drok ka la pynsngewkhia shibun eh ïa ka jinglong jingman ha Nongbah Shillong, ha kaba dang ha kine ki khyndiat sngi ba la dep, ka la don ka jingsuba ïap na ka jingdih kput ïa u drok ha ki bynta jong ka jingkieng Umpling, kata ruh u dei u khynnah ba dang pule ha ka klass 10.
Halor ka jingïap utei u khynnah klass 10, na ka liang ki bor pulit ki dang ap ïa ka Toxicology Report ba pynthikna.
Ha ka nohphai sngi jong ka 3 tarik u Iaïong 2026, la ïoh pdiang ïa ki dur ki dar ryngkat ka jingpyntip ba la don uba ïap na ka daw ka jingdih palat ïa u drok ha paiñkhana ba pyndonkam paidbah ha kawei ka jaka sumar ba paw khmat ha Shillong.
Katkum ka jingpyntip ki bor pulit ha ka 4 tarik u Iaïong 2026, na ka jingwad bniah halor kitei ki dur ki dar ba la ïoh pdiang ba la suba don uba ïap hapoh ka paiñkhana, ki la ïathuh ba ki bor pulit ka thanad Laitumkhrah ki ïoh jingpyntip ba la don u briew uba khang ïalade ha katei ka paiñkhana kaba don ha katei ka hospital.
Kumta la hap ban pynpait ïa ka jingkhang ha kaba la shem ba la don u briew uba la thiah lyngktar ha madan.
Na ka liang ki doktor ki la eksamin ïa u bad pynbna ba u la ïap bad la shem ruh ba um dei u nongthiah pang ha katei ka hospital.
Shuh shuh la lap ruh ïa ki thyrnia ba don ïa u drok heroin ha katei ka jaka leit paiñkhana, kaba la suba jur ba u la ïap na ka jingdih kput ïa u drok.
Kham hadien la ïoh jingtip ba la ithuh ïa utei u briew kum u Derick Dkhar, ba la 27 snem ka rta na Nongthymmai Nongshilliang.
