Jowai, Ïaïong 05
Ka Chad Sukra ym dei tang ka tamasa ka dei ka dak jong ka jingsngewnguh, ka jingïatylli bad ka jingkyrmen. Ka pynkynmaw ruh ïa ka jingdonkam ban sumar bad ban pynneh pynsah ïa ka riti dustur bad ka kolshor khamtam ha kane ka pyrthei kaba kylla sted.
Ïa kane la pynpaw da u Myntri ka tnad Art and Culture ka Sorkar Jylla Bah Sanbor Shullai haba kren kum u kongsan ha ka Chad Sukra ka Seinraij Jowai kaba la long ha Iawmusiang ha ka 5 tarik Ïaïong.
Ïa kane ka Chad Sukra la pynlong halor ka phang ‘Naduh wa wan haduh wa lai, bei rymaw iei rynieiñ wa pyndap wa pusai’.
Ka ‘Chad Sukra’ ka dei ka jingshad kaba ki Pnar ki pyni ïa ka Dustur ka Riti naduh ki por mynshwa bad la pynlong ïa kane ka jingshad hashwa ban bet ïa u symbai u phniang ha ki hali ki pynthor kum ka dak ban ai nguh kyrpang ïa ka Mei Mariang kaba la ai bam ai dih, ai jaka shnong jaka sah ïa u khun bynriew.
Haba bteng ïa ka jingkren, u Bah Sanbor Shullai u la khot ïa ka jingïatylli, ka jingieid, ka jingïaburom bad ka jingïalong kawei. U kyrmen ruh ba lyngba kane ka tamasa kan wanrah ruh ka jingroi jingpar, ka jingsuk bad ka jingkoit jingkhiah ha iwei pa iwei ki nongshong shnong.
Ha kane ka Chad Sukra la wan ban sakhi da ki hajar ki paid riewngeit niam tynrai ryngkat ki riam ki beit kiba iphuh iphieng kumjuh ki sur shad sur tem ba sngewthiang sngewtynnad.
Ki samla kynthei shynrang ha ki dong ki shnat ka sor Jowai kumjuh ki shnong marjan kila shim bynta lyngba ki jingshad bapher bapher, ryngkat ka kynhun na ka jylla Sikkim kaba la pyni ïa ka jingshad Singhi Chaam ne Snow Lion Dance.
Shwa kane, ha ka por mynstep, kala don ka jingïalang ha madan Ryngkaw Tpep Pale ha kaba u kongsan u dei u Myntri ka Sorkar Jylla bad MLA ka thaiñ Ma Wailadmiki Shylla uba la pynbna ban ai shiklur tyngka sha ka Seinraij Jowai.
Hadien ka jingïalang ka la don ka jingshad surok ne shad Mih Iaw ha kaba baroh ki khun ka Seinraij kila ïa shad kymbrum ryngkat ki sur ki rwai kiba pynsawa ïa ka shnong ka thaw naduh na madan Ryngkaw, lyngba ka Biar blai haduh ban da poi ha Iawmusiang.
