Tura, Ïaïong 05
U Deputy CEM barim ka GHADC uba dei ruh u MDC ka Rongrikimgre, u Nikman Ch Marak ha ka Sngi U Blei u la kyntait ïa ki jingkynnoh ba u la leh thok ïa ki kot ki sla ban thung be-aiñ ïa u Nokma na ka bynta ka thaiñ Chiading ha East Garo Hills, hadien ba la ujor ejahar pyrshah ïa u da ka Rikme T. Sangma ha thanad jong katei ka thaiñ.
Haba ujor kylla da ka ejahar (Counter FIR) ha u Officer-in-Charge ka thanad Chokpot ha South Garo Hills, u Nikman u la ong ba u shu mynjur tang ïa ka hukum ban pynrung kyrteng ïa ki Nokma katkum ki rekod bad ki kot ki sla kiba la buh hakhmat jong u, mynshwa ha u bnai Rymphang mynta u snem.
Da kaba kdew ba ki jingkynnoh pyrshah ha ka ejahar jong ka Sangma ki long kiba bakla bad ki bym don nongrim, u Nikman u la kynnoh ba ïa katei ka jingujor la mudui tang ban pyndik ïa u bad ban ïoh jingmyntoi ha kawei ka jingïakynad.
Ki jingkdew ha ka ejahar pyrshah ïa u Nikman la pynmih ha ki kot khubor bad ki la saphriang ruh ha ki rynsan lad pathai.
Da kaba kdew ba katei ka ejahar kaba la kynnoh thok ka la ktah ïa ka burom jong u kum u nongmihkhmat paidbah, u Nikman u la dawa ba dei ban leh eiei pyrshah ïa ka Sangma katkum ka aiñ.
