Nongpoh, Ïaïong 05
Ha kawei ka jingjia tyngkhuh kali ha ka sngi Saitjaiñ ha Ri Bhoi District, u nongñiah jong ka kali kamai taksi Maruti 800 kaba don ïa u registration number ML10-C-6892 lem bad uwei u nongbud, ki la lait salit na ka jingjia ba sngewsih hadien ba katei ka kali kaba ki shong ka la leit ban tynrah ïa ka jaka ïeng ki pulit pynïaid kali hapdeng ka surokbah bad shah syllad ruh ha kawei ka trok kaba don ïa registration number AS01-RC-8435 kaba dang hiar sha nongbah Guwahati.
Kane ka jingjia ka dei kaba la jia ha ka por 11 baje eiei mynstep ha ka surokbah National Highway 6 marjan bad ka Bethany Hospital Outreach kaba don ha ka shnong Pahamsyiem, Ri Bhoi District. La ïathuh ba ha katei ka jingjia, u nongñiah jong katei ka kali kamai ïa uba la tip kyrteng kum u Markus Mawphniang na ka shnong Korstep lem bad uwei pat uba bud lang ïa u, ki la shu lait salit na ki jingmynsaw ne ki jingjia ba sngewsih, lait noh tang ka jingjulor jong ka kali na ki bynta ba shakhmat.
Halor kane ka jingjia, ym lah satia ban tip shai mano ba bakla, hynrei na ka liang ki pulit ka thanad Nongpoh kiba la wan poi mar mar ha katei ka jaka ki la shimkhia ban leh ïa kaba donkam katkum ki kyndon jong ka ain bad ruh ban pynlong ïa ka jingtohkit kaba bniah ban lap ïa ka jingshisha halor katei ka jingjia.
