Shillong, Ïaïong 05
Ka Jaiñtia Students’ Union (JSU) kala aiti ïa ka dorkhas ha u Myntri Rangbah Conrad K Sangma, ban kyrpad ba un tuklar lem ha ka ban ïada ïa ka jinglong hok ka ilekshon bad ka hok ki riewlum ha ka thaiñ ri-lum Jaiñtia.
Ka seng kala kyrpad ban wanrah jingpynkylla ïa ka Assam and Meghalaya Autonomous District Council Rules, 1951, ban pynlong kongsan ïa ka syrnot Scheduled Tribe (ST) na ka bynta ki kyrtong bad nongthep vote ha ka ilekshon sha Jaiñtia Hills Autonomous District Council (JHADC).
“Ïa kane ka sienjam la tyrwa ban pynthikna ba ki kyrtong bad ki nongthep vote ki dei ban dei ki trai ri trai muluk ba shisha jong ka ri-lum Jaiñtia,” ong ka dorkhas.
Kala dawa ruh ban pynkylla ïa ka Rule 8 bad Rule 128 ban pyrkhing ba ka jingïoh ïakhun ilekshon JHADC ka dei ban long beit thik tang ïa ki riewlum trai muluk.
Ka Seng kala pynpaw ïa ka jingsngewkhia halor ka jingnang kha roi ki nongthep vote bar jylla ha ki thaiñ kum ha Lad Rymbai bad Lakroh, haba pynïadei ïa ka jinglong jingman na ka kam tih dewïong bad ka jingwan rung beaiñ.
Ka dorkhas kala dawa ban pyntreikam noh mardor ïa ka Special Intensive Revision (SIR) jong ka electoral rolls ha ri-lum Jaiñtia.
