Shillong, Ïaïong 06
Ka Kong Bobina Dhar, President ka Seng Longkmie Nongrah Dong Lummarboh ka la ïathuh ba ha ka step jong ka 06 tarik u Ïaïong 2026, ka la ïoh ka ‘phone call’ na ka ïingsah kaba don marjan bad ka jaka ba lap ïa ka byrni kaba la sma iwtung bad haba ki la peitbniah ki ipher shisha.
Haba kren sha ki lad pathai khubor ka Kong Bobina ka la ong ba mar-mar ka la pyntip noh sha ki Rangbah Dong, Rangbah Shnong ka Nongrah bad sha ki bor pulit bad ha ka jingpeit bniah ki pulit, la lap ba ka dei ka metïap kynthei kaba la boi ksaiñ.
Haba kylli ba ïoh lehse donkti u Kennedy ban pynïap ïa ka Kong Eilang, ka Kong Bobina ka la ong “Ïakata ngim don jingtip bad satang ki CCTV Camera kiba lah ban pynthikna dei mano ba wan bret ïa ka metïap jong ka Kong Eilang”.
Nalorkata, ka la ïathuh ruh ba la don kiba ïohi ba u Kennedy Khongsit uba dangshah kem ha ka jingsuba donkti pynïap ïa u heprit Kyrshanbor Kharmudai, u la ïaid lang bad ka Kong Eilang Phawa bad ki ïa leit ban dihsha lang ha Nongrah dong Lummarboh.
“Ki pulit ki la shim ïa ka CCTV na ïing jong nga ban peitbniah mano ba leit bret ïa ka metïap jong ka Kong Eilang sha katei ka jaka. Katkum ka jingïathuh uwei u khynnah ba kine ki ar ngut ki wan dihsha lang ha dukan,” la bynrap ka Kong Bobina.
Lah ban kdew ba ka Kong Eilang Phawa, 39 snem ka rta, ka la jah na la ïing naduh ka 20 tarik u Lber 2026, na ïingsah kaba don ha Nongthymmai Lawjynriew.
