Shillong, Ïaïong 06
U nongmihkhmat ka UDP na Nongpoh, Bah Mayralborn Syiem ha ka Lah Sngi U Blei u la pynpaw ïa ka jingkyrmen skhem ba ka jingïakren pynbeit pud hapdeng ka Meghalaya bad Assam kan sa sdang biang ynda la dep ki kam ilekshon ha Assam, ha kaba ka jingthep ‘vote’ kan long ha ka 9 tarik Ïaïong.
“Tang mar shu pynbna ïa ka risol bad thaw ïa ka Sorkar thymmai, nga kyrmen ba ki jingïakren kin sdang biang ban pynbeit ïa ki jingangnud ba sahteng jong ki paidbah ka Jylla,” ong u Bah Mayral haba kren sha ki nongthoh khubor.
Haba kylli shaphang ki jingïakynad kiba ju jia na ka por sha ka por ha shi lynter u pud u sam hapdeng kine ki 2 Jylla, u la batai: “Kane ka dei ka kam kaba dang ïai bteng. Baroh ar tylli ki Sorkar – naduh ka kyrdan jong ki Myntri Rangbah, ki Regional Committee, ki bor distrik, ki pulit bad ki bor pynjari aiñ – ki long kiba husiar bha bad ki pyntikna ïa ka suk ka saiñ, ka jingïada bad ka jingshngaiñ jong ki nongshong shnong. Ki jingjia ki ju jia, ngim lah ban len ïa kata, hynrei ngi hap ban shimkhia mardor ïa ki.”
La ka Meghalaya kan pynbor ïa ka Sorkar Assam bathymmai ban sdang biang ïa ka jingïakren, u Bah Mayral u la pynpaw biang ïa ka jingkyrmen skhem bad ong, “Ngi don ka jingkyrmen kaba khraw ba ka Sorkar bathymmai ha Assam kan sngap bad kin don ki jingïakren na baroh arliang ban pynbeit noh kloi ïa kane ka mat.”
