Shillong, Ïaïong 06
Ka Shillong Lajong FC ka la long ba la khreh ban ïakhun pyrshah ïa ka Dempo SC ha ka lympung ïalehkai Indian Football League ka ban long mynta ka sngi Ba-ar ha PJN Stadium, Goa ha ka por 6:30 janmiet.
Kane ka long ka jingïalehkai kaba saw shabar na la ïing na ka bynta ka Shillong Lajong bad dangshen ka la ïakhaid khlem don bathep kol pyrshah ïa ka Sreenidi Deccan ha kaba ka la kamai 11 poiñ na ki hynriew sien ïakhun.
Te kumta kane ka kynhun ïalehkai ka nongbah hapoh ka jingïalam u Verendra Thapa (coach) ka la khmih lynti ban wanphai da ka jingkhlaiñ bor khnang ban khur ïa ka jingjop bad ban jam sha ka kyrdan ba hakhlieh.
Na ka liang u coach u la pynpaw ba ka kynhun ka la long ba la khreh na ka bynta kane ka jingïakhun, hynrei kum ka kynhun kam dei ban kheiñ sting ïa ka liang pyrshah. “Ka Dempo ka long ka kynhun kaba biang watla kam shym la lah ban khur jingjop ha ki jingïalehkai ba la lah.”
Ka jingjop ka Shillong Lajong ym tang ba kan jam sha ka kyrdan ba hakhlieh, hynrei kan ïarap ban jam sha ka wat kaba ar jong ka Championship Round.
