Shillong, Ïaïong 06
Haba pynpaw ïa ka jingsngew halor ka jingkiew bad paw jong ka Voice of the People Party (VPP) ha ka ilekshon Lok Sabha ha u snem 2024, u MLA ka UDP Bah Mayralborn Syiem u la ong ba ka saiñ pyrthei ka ju kylla barabor bad ki nongthep vote ka Meghalaya kin sa rai ha kaba kut.
U Bah Mayralborn u la ong ba man la ki seng saiñ pyrthei ki ju mad beit ïa ka por ka jingkiew bad ka por ka jingkhyllem bad ka nusib ka ju kylla beit bad ïa ka rai ha kaba kut kin sa ai ki nongthep vote ka Meghalaya.
“Lada phi kren ïa ka politik ha Delhi (national politics), ka la don ka por ha kaba ka Congress ka la long kaba khlaiñ bha bad mynta pat ka la tlot hi ïar. Ka BJP ka la long kaba khlaiñ bha. Ki paidbah ha ka por kaba dei kin sa ai ïa ka jubab ïa kano-kano ka Sorkar. Kane ka dei kaba ju jia beit,” la ong u Bah Mayralborn haba kren bad ki lad pathai khubor ha ka sngi Nyngkong bad bynrap ruh ba ym don kano-kano ka seng ka ban neh sah shirta.
“Ka don ka por ïa kiei-kiei baroh. Ka don beit ka jingkiew bad ka jinghiar jong kano-kano ka seng saiñ pyrthei,” kynthoh u Bah Mayral.
“Kam don satia kano-kano ka seng saiñ pyrthei ka ban neh haduh 40-50 snem. Kane ka dei ka jingitynnad jong ka synshar paidbah- ta ka daw ngi dei shibynta jong kane ka synshar paidbah ba don da ka riti synshar, ki ilekshon bad ka jingkylla ha ka jingpaw,” u la ong.
U Bah Mayral u la ong ba ym tang ka VPP hynrei man ki seng saiñ pyrthei kila mad ïa ka jingkyrshan u paidbah ha ki por bapher-bapher.
“Ka BJP kala pawnam bha, ka NPP kala paw, ka UDP ruh. Baroh ki seng saiñ pyrthei kila paw nam. Phim lah ban tip kaei pat ka ban jia. Ki nongthep vote ka Meghalaya ki dei kiba stad bad ki tip ïano ban jied kum ki nongmihkhmat jong ki. Ngi ieh ha ka jingstad u paidbah,” u la ong.
