Mawkyrwat, Ïaïong 06
Ka kynhun ki sengbhalang jong ka Mawsyn-ram C&RD naduh ka Hynñiewtrep Youth Council (HYC), Federa-tion of Khasi Jaiñtia & Garo People (FKJGP) bad ka Hynñiewtrep National Youth Front (HNYF) ha ka 6 tarik u Ïaïong, 2026 ki la pynlong ïa ka jingïalang paidbah ha ïew Mawsynram, ban pyrshah jur halor ka jingaiti ka Sorkar lyngba ka tnad MePDCL sha ka SAI Computer Limited ban sam bording ilektrik hapoh ka thaiñ Mawsynram.
Katkum ka jingïoh jingtip na ki paidbah, la ïathuh ba ka don ka jingtrei torti jong ka SAI Computer Limited kaba dang shimti ban sam bording dang kumba saw ne san bnai eiei hapoh kane ka thaiñ.
La ïoh jingtip ba kane ka kompeni ka ju leh thurmur khamtam ha ka jingpynkiew ïa ka bai thang bording kaba la palat pud kaba la ktah ïa ki paidbah nongthang bording bad la ïathuh ruh ba kane ka kompeni kam ju don jingmap ïano ïano wat lada ki paidbah ki buh ka jingkyrpad.
Ha kane ka sngi nalor ki sengbhalang, la wan ban ïashimbynta lang da ki seng longkmie ki Rangbah Shnong bad ki paidbah jong ki lai tylli ki block ka Mawphlang, Mawsynram bad Ranikor Block ha kaba ki la pynpaw ka jingpyrshah kaba jur ïa ka SAI Computer Limited ban sam bording ha kine ki thaiñ bad kwah ba ka MePDCL kan shimti biang khnang ba ki duk ki suk kin dang ïoh biang ïa ka skhim baduk kaba tip kum ka BPL.
Hadien ka jingïalang la ïoh ruh ban pynlong ïa ka ‘signature campaign’ kum ka jingpyrshah ïa kane ka kompeni ban sam bording hapoh kane ka thaiñ.
U samla Roykupar Synrem haba ai jingkren u la ther tyngeh ïa ki lai ngut ki MLA jong ka Mawphlang, Mawsynram bad Ranikor Constituency kiba na ka UDP kiba don ha ka bor synshar, ba balei kim leh eiei halor kane ka kam khamtam ban rah hapoh ka ïingdorbar thawaiñ.
“Balei kim kren eiei ïa la u jong u President u Bah Metbah Lyngdoh uba bat ïa ka tnad Bording. Jin lada ki kren, ngam tharai ba ki paidbah bad ki sengbhlang kin hap ban mih kumne,” ong u samla Roykupar.
U la ong ruh ba ka MeECL bad ka MePDCL ka dei ka kompani kaba ka Sorkar ka la buh na ka bynta ban peit bad pynbiang ïa ka bording ilektrik ha ka Jylla bad ka dei ka kompani kaba ïoh tulop na ka Sorkar Jylla hynrei balei ka Sorkar ka dang kwah ban wanrah ïa ka SAI kompani kaba naduh UP? Kin leh aiu shuh kine ki nongtrei ka MeECL bad MePDCL lada wanrah na bar jylla.
Kumta na ka liang u samla Roykupar ula kyntu jur ïa ka Sorkar khamtam ïa u Myntri ba dei peit ïa ka tnad Bording ba u dei ban weng noh mardor ïa ka MoU kaba ka Sorkar ka la ïasoi bad ïateh bad kane ka kompeni.
La pynïaid ïa kane ka jingïalang da u Bah Tyngshain Ronsang, Chairman Kynhun Sengbhalang Mawsynram C&RD Block bad ki nongkren ha kane ka sngi ki long u Bah Roykupar Synrem, President HYC Sengkmie, Bah Eldie N Lyngdoh, General Secretary FKJGP Sengkmie, Bah Hesting Lyngdoh, Vice President HNYF Sengkmie, ki seng longkmie, Myntri shnong bad kiwei kiwei.
