Shillong, Ïaïong 06
U nongmihkhmat ka UDP na Nongpoh, Bah Mayralborn Syiem ha ka Lah Sngi U Blei u la kyntait ïa ki khubor ba ka don ka jingïapher jingmut hapoh ka United Democratic Party (UDP) halor ki kam nongïalam, da kaba ong ba um don jingtip satia haba ïadei bad kano-kano ka sienjam kaba kum kata bad um don bynta eiei ruh bad ka jingïadon kynhun.
Haba kylli halor ki khubor shane-shatai ba kiba bun ki dkhot ka UDP kim sngewhun bad ki kam nongïalam ba mynta, u Bah Mayral u la ong, “Ngam don bynta eiei bad kata ka jingïadon kynhun ne kita ki jingïakren. Ngam don jingtip eiei.”
U la bynrap ba ym shym la don mano-mano ruh uba la wan kynjoh sha u ban pynïasoh
bad kano-kano ka kynhun.
“Ka kamram jong nga ka long ban pyndep. Haduh mynta ym pat don mano-mano ruh ba wan sha nga – ban don ka kynhun ban leh kumne ne kumtai namarba kim sngewtynnad ïa ka rukom pynïaid kaba mynta – ym pat don mano-mano ruh ba wan sha nga,” u la ong.
U Bah Mayral u la ban jur ba ka jingpynleit jingmut jong u ka long ha ka synshar-khadar.
“Ka kamram jong nga ka long ba ngan ïoh ïa ka thiah ka dem kaba suk ba saiñ man ka miet namarba nga pyndep hok ïa la ki kamram. Ngam don por ïa ki kam ïadon kynhun hangne-hangtai, ban thaw ïa kata ka kynhun, ïa kane ka kynhun – ngam don satia ha kata ka laiñ,” u la ong.
U la kubur ruh ba ka saiñ pyrthei ka long kaei-kaei kaba hap ban ïakhun, da kaba ong, “Man la ka seng saiñ pyrthei ka dei ka jingtynjuh ïa nga. Baroh ki seng saiñ pyrthei ki la kynjoh ktien ïa nga. Nga don ki paralok ha baroh ki seng saiñ pyrthei.”
Halor ka jingkylli la hato ki la don ki jingtyrwa ban kylla liang kiba la wan sha u, u Bah Mayral u la jubab, “Ha ka synshar paidbah kaba khih ba ksar, ki jingïakren ki don beit. Ka jingmih noh bad ka jingpynïasoh – kine baroh ki long shi bynta jong ka jingïakren. Ki la don ki ‘feeler’ na baroh ki seng saiñ pyrthei.”
