Shillong, Ïaïong 06
Ki rangbiria ka Hima Khyrim ki la rah ïa la ki nam lahduh ha ka lympung ïakob siat khnam jong ka 33th Rongbiria Ki Hima Ka Ri Hynñiewtrep, ba la long ha ka sngi Ïew Shyllong, kata ka 4 tarik mynta u bnai ha madan ïasiat ha Smit.
Ïa kane ka jingïakob la pynlong da ka Apphira Archery Competition (AAC) namar ka 4 tarik u Ïaiong jong u snem 1829, ka dei ka sngi ba hiar thma u Syiem Tirot Sing ka Hima Nongkhlaw ïa ki bor synshar Phareng.
Haba phai sha ka jingïakhun, ha ka ïakob siat kaba para marwei, la mih madan haduh 281 ngut ki rangbiria, ha kaba ka nam lahduh ka leit sha u Shailangstar Khongsngi ka Hima Khyrim, ha kaba u la ïoh artad ban khur ïa ka song pisa kaba long T. 15,000 ryngkat. Ïa ka kyrdan balai la ïoh da u Nang-pynbhalang Kharbyngar na Hima Khyrim uba la khur ïa ka song pisa kaba T. 7,000 bad ba-lai u Revistar Mawthoh na Hima Khyrim na ka bynta ban khur ïa ka song pisa kaba T. 3,000.
Ha ka ïakob siat kynhun la mih madan da 107 tylli ki kynhun ha kaba ka nam lahduh ka leit sha ki arngut ki rangbiria kata u Shaibingstar Khongsngi bad u Kobin Roy Khong-sngi, ka Laitkyrhong ‘A’, Hima Khyrim, kaba la wan hadien ka leit sha ki arngut pat ki rangbiria ka Laitkyrhong ‘AA’, u Kestarwin Rynjah bad ïa u Bestarbok Nongkynrih.
Ka kynhun lahduh ha ka ïakob siat kynhun ki leit phai ïing ryngkat ka song pisa kaba long T. 35,000 bad ka Stieh Bor Manik Syiem kaba long ka nongkynti jong ka Committee, hynrei ka kynhun lahduh kan ïoh rah ei ïa ki Stieh Khun. Katba ka kynhun ba wan ba-ar la ïoh ïa ka song pisa kaba T. 15,000, katba ki kynhun kiba wan ba-lai ki ïoh ban khur ïa ka song pisa kaba T. 5,000.
Ha ka por mynstep la wan ban plie ïa kane ka rongbiria da u Symbud Kongsan ba dei artad u Syiem Khynnah ka Hima Khyrim u Pa’em Habapan Sing Syiem bad la ïoh ïa ka jingkyntiew ïa ka lama ka Apphira Archery Commit-tee (AAC) da u Rgh Wallamphang Roy ba dei u Chairman ka AAC, bad kumjuh ka jingkyntiew ïa ka lama ka Hima Khyrim da u Syiem Khynnah ka Hima Khyrim.
Hadien kane ka la don pat ka nguh ka dem, kaba la pyndep ïa ka da u Riew Tymmen Riewsan u Rgh Skor Jala, bad la bynrap da ka jingkren kaba la ai da u Rgh D.L Nongbri dkhot ka AAC.
Ha ka por janmiet, kongsan ba la wan ban sakhi lang da Pa’iem Dr Balajied Sing Syiem, Syiem ka Hima Khyrim.
Hadien ba la kut ka phainal la ïoh pat ban sam ïa ki khusnam sha ki rangbiria kiba la khur ïa ki nam jop jong ki, ïa kaba la sam da u kongsan ryngkat ki kato katne ki riew pawkhmat. Ïa ka jingïa-lang sam ïa ki khusnam bad ïa ki kyntien ai khublei, la ai da u Rgh Mario Sunn, dkhot ka AAC. Ïa ki khusnam baroh la noh synñiang da ka Centre Point Group Enterprise (CPGE).
