Shillong, Ïaïong 06
Ha ka sngi Nyngkong jong ka taïew, ka 06 tarik u Ïaïong 2026, la lap sa ïa kawei ka metïap jong ka longkmie, kaba la thep hapoh byrni ha kawei ka wah kaba dei khappud Nongrah Lummarboh bad Rynjah.
Katei ka metïap ka dei jong ka Kong Eilang Phawa, ba la don 39 snem ka rta, kaba sah ha Nong-thymmai Lawjynriew, kaba dei na West Jaiñtia Hills District.
Ïa ka metïap jong ka Kong Eilang Phawa la lap nyngkong da ki longkmie jong ka Shnong Nongrah Lummarboh ha ka sngi Nyngkong, ha kaba nyngkong ka la mih ka jingsma iwtung bad ha ka jingpeit bniah ki bor pulit la lap pynban ïa ka metïap jong ka longkmie kaba la boi ksaiñ kaba la thep hapoh byrni.
Kane ka longkmie ka dei kaba la jah naduh ka 20 u Lber 2026, na jaka sah na Nongthymmai Lawjynriew.
Hadien ba la lap ïa katei ka metïap na ka liang u Superintendent of Police ka East Khasi Hills District, u Bah Vivek Syiem dalade hi u la poi sha katei ka jaka ban peitbniah ïa ka jinglong jingman.
Ïa ka metïap jong ka Kong Eilang Phawa ki pulit ki la rah noh sha NEIGRIHMS Hospital, Shillong ban pyndep ïa ka post mortem.
Haba ïakren bad ka Kong Sandra Syiem kaba dei bahaïing bad ka Kong Eilang Phawa ka la ïathuh ba naduh ba ka Kong Eilang Phawa ka la jah na la ïing, ki la ïa wad hynrei kim shym la lap satia.
Ka Kong Sandra ka la ïathuh ba ka Kong Eilang Phawa ka dei ka briew kaba duna ha ka bor ïohsngew bad ka bym da lah ruh ban ïakren bad ki briew namar ka don ha ka jingduna.
Ka la ïathuh ruh ba ka Kong Eilang ka la jah naduh ka 20 tarik u Lber 2026, bad ki la pyrshang ban wad sha Children Hospital bad sha kiwei-kiwei de ki jaka ba marjan hynrei kim shym la lap satia bad dei tad mynta ka sngi ba ki la ïoh jingtip ba la lap ïa ka metïap jong ka na Nongrah Lummarboh.
Haba kylli, ka la ong ba kim shym la don kano-kano ka jingsuba sniew ba shah pynïap, da kaba pynthikna ba ka metïap ka dei jong ka Kong Eilang Phawa.
