Nongstoiñ, Ïaïong 06
Ka Hynñiewtrep Youth Council (HYC) West Khasi Hills District ka la lap ba ki dukan die dawai hapoh Ïew Shallang kim don lisen satia na ka tnad ka koit ka khiah ha kaba ki kot kaba ki don ki la kut naduh 2012, 2018, 2021 ter ter.
Ka seng ka la lap ïa kane ha ka jingkhynra kaba la pynlong hapoh ka jingïalam u samla Lumlang Kharsyiemlieh, President bad samla Losbingnel Lyngkhoi President ka HYC Mawshynrut Circle bad samla Denis Nongbak President HYC Shahlang Area Unit bad ki dkhot jong ka.
U samla Lumlang u la ong ba ïa kane la lap ha ka 4 tarik Ïaïong 2026 hadien ba ka seng ka la hiar ha Ïew Shallang ban khynra ïa ki kot ki sla jong ki dukan bar jylla ha kaba 180 tam ki dukan kim don ‘Trading Licence’ na ka KHADC, kiba shong beaiñ, ha kaba ka seng kala khang noh.
U la ong ruh ba ha kane ka jinghiar ka seng ha Shallang kum ban kyrsiew thiah ïa ki nongshong shnong ka Shallang la lap ba ki dukan die dawai kim don lisen na ka tnad ka koit ka khiah hynrei kiba don ki la kut naduh 2012, 2018, 2021, ter ter.
U samla Lumlang u la ong ruh ba ka seng kala lap ruh ïa ka dukan ha kaba u bar jylla u ïoh syrnod (Certificate) doktor watla um dei satia u doktor.
U la ong ruh ba ka seng ka kyrpad ïa ka tnad ka koit ka khiah ba kam dei ban ailad kumne namar ïoh mad jingeh ki paidbah ka thaiñ.
Nangta u la ong ruh ba ka HYC kan sa ïakynduh ïa ki ophisar ka tnad ka koit ka khiah ban leh eiei ïa kitei ki dukan bad u la bynrap ruh ba ka HYC ka lap ruh ba don ki paradoh para snam kiba ai wai ïa ka Licence Drug Store ha ki bar jylla ban pynïaid ïa ka dukan da ki bar jylla.
“Ka HYC kam kynthoh ïano ïano hynrei ka kyntu ba kin kylla thiah kylla dem noh namar lada ailad ïa ki bar jylla khlem kot ba kin wan die dawai ne wan leh mynleh kum ki doktor wat lada kim biang kot, lada ïoh ba ki die ïa ki dawai bala kut por ba don bih mano ban kitkhlieh lada jia eiei ïa ki nongshong shnong,” ong u samla Lumlang.
