Shillong, Ïaïong 06
Ka Lion Y&SA ka la long kawei pat ka kynhun kaba la rung sha ka final ha ka District Cricket League 2026 ba la pynlong da ka West Jaiñtia Hills District Cricket Association, hadien ba ka lah ban pynliem noh ïa ka West Jaiñtia Police CC da 27 run ha ka jingïakhun semi final kaba ar kaba la long ha ka sngi Saitjaiñ ha Jowai.
Ha kane ka jingïakhun ka Lion kaba la kam trai ban tied nyngkong, ka la kamai 190 run ha ki 34.2 over bad shah pynkhyllem baroh ki nongtied. U Nick Dann lem bad u kapten u Deibormi Rngad ki la long kiba kynsai ha kaba ki la ïoh ban khyrwit ïa ka shiteng spah run (half century). U Nick Dann u la tied 66 run na ki 58 bol bad u Deibormi u la ïoh 50 run na ki 65 bol. Katba ki nongkawang bol ka West Jaiñtia Police u MS Bishal u la khur 3 wiket bad ïa ki 2 wiket la khur da u Devention Lyngdoh.
Haba wan beh ïa ka thong, ka West Jaiñtia Police ka la kamai tang 163 run ha ki 30.2 over hadien ba ka la shah pynkhyllem baroh ki nongtied. U Obadaïa Bareh u la tied 56 run na ki 54 bol bad u Kenny Wann u la ïoh 25 run na ki 32 bol. Katba ki nongkawang bol ka Lion u Peterson Lamare u la khur 5 wiket, katba u Noondaystar Pohrmen bad u Deibormi Rbngad ki la khur mar 2wiket. Ïa ka nam Man of the Match la khur da u Peterson Lamare jong ka Lion.
Lyngba kane ka jingjop, ka Lion Y&SA kan pynkhreh ban ïakhun final pyrshah ïa ka Goodwill Mupliang SC ha ka 7 tarik mynta u bnai ha Khliehtyrchi Mini Stadium ha ka por 9 baje mynstep. U Myntri ka tnat ïalehkai u Bah Wailadmiki Shylla un long u kongsan lem bad u Bah Medling Swer, MDC (Executive Member ka JHADC) kum u symbud kongsan
La khmih lynti ba kane ka jingïalehkai final kan long kaba itynnad, bad na ka liang ka West Jaiñtia Hills District Cricket Association ka la wer ïa baroh kiba ïeid bad sngew tynnad ban peit kriket ban wan sakhi ïa kane ka jingïalehkai ba khadduh ki ban rah syndon ïa ka nam lahduh.
