Shillong, Ïaïong 06
U Bah Vivek Syiem, Superintendent of Police ka East Khasi Hills District, u la pynthikna ba ïa ka Kong Eilang Phawa la shah pynïap bad ki pulit ki la suba ruh ïa ki briew kiba la leh ïa kane ka kam.
Haba kren sha ki lad pathai khubor ha Nongrah, u Bah Vivek Syiem u la ïathuh ba kane ka metïap ka dei jong ka Kong Eilang Phawa, 39 snem ka rta, kaba la jah naduh ka 20 tarik u Lber 2026, kaba sah ha Nongthymmai Lawjynriew kaba dei na West Jaiñtia Hills District.
U la pyntip ruh ba ki bahaïing ki la wan poi ha katei ka jaka bad la rah noh ïa ka met jong ka Kong Eilang Phawa ha North Eastern Indira Gandhi Regional Institute of Health and Medical Sciences (NEIGRIHMS) ban leh ïa ka post mortem.
“Ngi la don ka jingsuba ïa ki briew kiba la donkti ban leh ïa kane ka kam pynïap,” la bynrap biang u Bah Vivek.
U Bah Vivek u la ïathuh ruh ba ka metïap hapoh ka byrni plastik ka la don kumba 10 sngi eiei hynrei yn sa pynthikna shuh-shuh hadien ba la dep ban leh ïa ka post mortem.
