Shillong, Ïaïong 06
Ka Voice of the People Party (VPP) ka la thoh sha u Myntri Rangbah-duh ka ri, u Narendra Modi ban pynpaw ïa ka jingsngewkhia haba ïadei bad ka jingtyrwa ïa ka ‘Foreign Contribution (Regulation) Act Amendment Bill, 2026’, khamtam ïa ki kyndon ki ban ailad ïa ka Jylla ban shimti ïa ka jingpynïaid halor ki jingdon-jingem jong ki kynhun seng kiba ïa ka jingpynrung kyrteng FCRA la pyndam noh.
Ha ka shithi, u President ka VPP, u Bah Ardent Miller Basaïaw-moit, u la ong ba ka seng ka pdiang ïa ka bynta jong ka Sorkar ban pyntikna ïa ka jinglong khuid bad ka jingshngaiñ ka ri hynrei u la maham ba ki katto-katne ki kyndon ki lah ban don ïa ki jingmih ki ban ym khmih lynti na ka bynta ki kynhun shlem ha ka imlang-sahlang.
“Watla ka jingpeit bniah ïa ki kyndon aiñ ka long kaba donkam, kum kine ki bor kiba ïar bad ba donbor ki buh ïa ki jingkylli kiba sngewkhia halor ka jinglong-jingman kaba ïa-biang lang, ka rukom treikam kaba ïaid beit, bad ka jinglah ban pyndonkam bakla,” la ong ka shithi.
Ka VPP ka la kdew ba kiba bun ki shlem kiba shah ktah, kynthup ïa ki kynhun Khristan, ki la treikam katkum ka aiñ da ki phew snem ha Meghalaya, da kaba pynbiang ïa ki jingshakri sha ka pule-puthi, ka koit ka khiah, bad ka roi ka par ha ki jaka nongkyndong.
“Kano-kano ka saiñdur polisi kaba wanrah ïa ka jingbym tikna ha kaba ïadei bad ka jinglong trai bad jingpynïaid ïa kum kine ki shlem treikam ka lah ban pynthut (khlem da tip) ïa kine ki jingshakri bad ktah ïa ki lad kamai jong kiba bun bah ki nongïoh jingmyntoi,” ka la ong.
Ka seng kumta ka la kyntu ïa ka Sorkar ban pyrkhat biang haba ïadei bad ki kyndon ban shimti ïa ki jingdon-jingem, ban pyntikna ïa ka rukom treikam kaba ïaid beit, ban pynlong ïa ki jingïamir-jingmut kiba kham bniah bad ki nongshim bynta ha ka Thaiñ Shatei Lam Mihngi, bad ban wanrah ïa ki lad jingïada ban ïada ïa ki kam leh-sbun ba shisha.
“Ngi ngeit ba ka sienjam kaba ïabiang lang ka lah ban urlong-ka rukom treikam ka ban ïada ïa ki jingmyntoi jong ka ri, ha kajuh ka por ka ban ïada ruh ïa ki jingsynñiang ba kordor jong ki kynhun seng ka imlang-sahlang,” la thoh u Bah Ardent.
