Nongstoiñ, Ïaïong 06
Ka Nongstoiñ Football Fan Club ha ka sngi Saitjaiñ ka la pynkut noh ïa ka lympung ïalehkai futsal ba la tip kum ka 1st Futsal League Tournament ha kaba ka Al- Nasar FC ka la khur ïa ka nam lahduh.
Kane ka nam tam ka la wan hadien ba ka la pynliem noh da 3-1 kol ïa ka Nongstoiñ Chelsea Fans ha ka jingïalehkai final kaba la long ha madan Kwis Futsal, Nongrim Upper New Nongstoiñ .
Ïa ka nam Top scorer la khur da u Kyrshan Tariang na ka Nongstoiñ Chelsea Fans uba la thep 14 kol, Best Goalkeeper ka leit sha u Donkupar Lyngdoh na ka Nongstoiñ Gunners Arsenal fans, ïa ka Emerging Player la ïoh da u Banteinam Ïawphniaw na ka Nongstoiñ Hala Madrid, katba ka Best Player of the Tournament ka leit sha u Hopefullnes Wanñiang na ka Al-Nassr Fc bad ïa ka nam ka Best Discipline Team la ïoh ban khur da ka Nongstoiñ Gunners Arsenal fans. Ïa ki khusnam la sam da u Bah G.J.L. Sangriang kum u kongsan.
Na ka liang ka Nongstoiñ football Fans Club ka la pynkynmaw ba ïa kane ka lympung la seng ki riew ïeid ïa ki klob ba paw na ka thaiñ Nongstoiñ, West Khasi Hills District ban pynshlur ïa ki riew ïeid ïa ki klob ban mih madan ym tang ban kyrshan bad ruh ban ïaleh na ka bynta ban pyllait na ki kam sniew kiba kynrei bad ka phang pdeng jong kane ka lympung ka long “Say no to Drugs”.
