Shillong, Ïaïong 06
Ka Rangkynsai SC ka la lah ban pynthikna ban jam sha ka semi final ha ka P.A.Sangma Memorial T20 Cricket Tournament 2026 ba la pynïaid da ka Shillong Cricket Association, hadien ba ka la lah ban khur ïa ka jingjop kaba ar da kaba pynliem ïa ka kynhun kaba na Assam, ka Rhinoland Cricket Academy da 8 wiket ha ka lah sngi U Blei.
Ka Rangkynsai ka la lah ban pynliem ruh ïa kawei pat ka kynhun kaba na Assam, ka Capital Starts da 9 run ha ka jingïalehkai kaba nyngkong jong ka Super 8. Te kumta kane ka kynhun mynta ka la kamai 4 poiñ na ki ar sien ïakhun bad ka donkam ban jop sa ïa ka Royal CC ha ka jingïalehkai kaba khatduh ka ban long mynta ka sngi Ba-ar khnang ba kan ïoh ban bat ïa ka kyrdan ba hakhlieh ha ka Group-2.
Haba phai sha kane ka jingïakhun kaba la long ha madan Polo, ka Rangkynsai kaba la jop ïa ka kynting pisa, ka la ailad shwa ïa ka Rhinoland ba kan tied nyngkong ha kaba ka la kamai 171 run bad shah pynhap 8 wiket ha ki 20 over. U Sumit Kashyap u la tied 42 run na ki 28 bol bad u Dhruv Raj Bora u la ïoh 39 run na ki 25 bol. Katba u Ajay Duhan u la khur 4 wiket bad ïa ki 2 wiket la ïoh da u Sudhir Sahani.
Ka Rangkynsai kaba la wan shimti ïa ka pali kaba ar, ka la lah ban kynjoh sha ka thong da kaba kamai 175 run bad shah pynhap 2 wiket ha ki 16.1 over. Kane ka la wan lyngba ka jingïalehkai bha u Kishan Lyngdoh, uba la ïoh ban khyrwit 120 run na ki 58 bol bad u Ajay Duhan u la ïoh 36 run na ki 30 bol. Katba u Raj Agarwal bad u Aayushman ki la khur mar 1 wiket.
Te kumta lyngba katei ka jinglah ban ïalehkai bha u Kishan u la ïoh ban khur ïa ka nam Player of the Match.
