Shillong, Ïaïong 06
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong u Bah Istarwell K Sadew u la ai ka jingujor ba ha ka step jong ka 3 tarik mynta u bnai, ki runar bym lah ban ithuh ki la tuh ïa kawei ka arshaka kaba don ïa u registration number ML05-AC-7143 na ka phyllaw ka jaka sah jong u, kaba don ha shnong Sadew ha East Khasi Hills.
U Bah Wallamjop Wahlang u la ai ka jingujor ba hapdeng ka miet 1 tarik bad 2 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-5199 na ka thaiñ Mawlai Nongkwar, Block-13, Shillong.
Na ka liang jong u Bah Roningstar Kharmawlong ruh u la ai ka jingujor ba ha ka shiteng miet jong ka 4 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML15-0597 na ka thaiñ Mairang ha Eastern West Khasi Hills.
U Insp. Khemraj Mena u la ai ka jingujor ba ha ka 2 tarik mynta u bnai, ki shipai BSF kiba dang pahara ki la ïoh ban kurup noh ïa kawei ka arshaka kaba don ïa u registration number ML05-AD-5299 kaba la shu iehnoh kumto na ka khlaw kaba don hajan jong BP No. 1283/7-S (WJH).
Ha kawei pat ka khubor, u Secretary ka Gopalbari Management Committee Mahendraganj (SWGH) u la ai ka jingujor ba ha ka 2 tarik mynta u bnai ha ka por kumba 1.30 mynsngi, ki runar bym lah ban ithuh ki la prong tuh hapoh ka phyllaw jong ka jaka mane blei bad ban tuh haduh 60 gram ki pisa rupa kiba shongdor haduh kumba T.60 hajar.
Na ka liang jong u Horbindra Koch u la ai ka jingujor ba ha ka 2 tarik mynta u bnai ha ka por kumba 2.45 dang step, ki runar bym lah ban ithuh ki la tuh ïa ki waiar cables bad uwei u bateri kiba shongdor kumba T.1.98 lak na u tower ka Jio uba don ha Chengkompara (SWGH).
Ha kawei pat ka khubor, u Amar Bhaskar u la ai ka jingujor ba ha ka 30 tarik jong u bnai ba la lah, ha ka por kumba 12.10 mynsngi, ki runar bym lah ban ithuh ki la rung hapoh ka Ampati Engineering College (SWGH) bad ban tuh ïa kawei ka solar operated CCTV camera kaba shongdor T.10,000/-.
