Mawkyrwat, Ïaïong 06
Ka South West Khasi Hills District Kayaking and Canoeing Association ha ryngkat ka jingïatrei lang bad ka Meghalaya Caneo Association ha ka lah sngi U Blei ka la pynlong ïa ka jingai jinghikai kinglieng ne ka Kayaking Awareness Camp ha Wah Mawpon Mawkyrwat, South West Khasi Hills District.
Hadien ka Ri Bhoi, ka South West Khasi Hills ka la long sa kawei pat ka distrik jong ka Jylla kaba la sdang ïa kane ka jinghikai kinglieng bad ha katei ka sngi ki la don kumba 50 ngut tam ki samla kynthei bad shynrang kiba la wan ïashim bynta ban ïoh ka jingshah hikai.
Na ka liang u MLA ka thaiñ u Bah Renikton L. Tongkhar kum u kongsan u la ai ka jingïaroh ïa ki nongïalam ka South West Khasi Hills District Kayaking Association kiba la shem ïa ki nongkitkam ka MCA ban pynlong kum ïa kane ka jinghikai kinglieng bad kyrmen skhem ba kan long shisha ka jingmyntoi kaba khraw ïa ki samla khamtam kane ka jingïalehkai ka don ha ka Olympic.
U la kyntu ruh ïa ki khynnah ba ki dei ban trei shitom bad ïalehkai bha khnang ba kin shah jied bad u la ïathuh ruh ba ka sorkar mynta ka phai khmat sha ki khun samla bad ki nongïalehkai ha kaba ka pynheh ïa ka mang tyngka ha kaba ïadei ka kam ïalehkai na ka T.40 klur sha ka T.800 klur ban pynlut na bynta ki jingïalehkai bapher bapher.
U la ïathuh ruh ba ka sorkar ka la pyntreikam ruh ïa ka Sports Policy ha kaba ki samla kiba khur takma ha ki lympung ïalehkai National bad International level kin ïoh ïa ka kam sorkar khlem da donkam ban leh ïa ki interview.
