Shillong, Ïaïong 06
Ka Sorkar Jylla ka la pynlut T. 40 klur na ka bynta ki synjuk ïalehkai bapher bapher kaba long shi bynta jong ka jingpynkhreh ïa ka 39th National Games ka ban long ha u snem 2027 ha kane ka Jylla.
Kat kum ka jingpynpaw da u Myntri Rangbah ka Jylla u Conrad K Sangma ha ka rynsan social media, u la ong ba kane ka jingpynkhreh ka dangïaid shaphrang ban pynbiang nadong shadong halor ki jaka ïalehkai bapher bapher.
“Ka Sorkar ka la ai jingkyrshan T.40 klur tyngka sha ki synjuk ïalehkai bapher bapher na ka bynta ban pynbiang ïa ki tiar ïalehkai, kumjuh la thung ruh ïa ki coach bapher bapher da kaba wanrah ruh katto katne nabar Jylla khnang ban ai jinghikai ïa 3000 ngut ki nongïalehkai ka Jylla,” u la bynrap.
Katei ka jingai jinghikai ka long shi bynta jong ka jingpynkhreh na ka bynta katei ka lympung kaba heh duh hapoh ka ri.
Lah ban kdew ba ka jingwanrah ïa ki katto katne ki coach kiba nabar ka la long kaba seisoh ha ka ban kyntiew ïa ki nongïalehkai ka Jylla ha kaba dangshen ki la lah ban khur takma 2 tylli ki ksiar lem bad 7 tylli ki takma rnong ha ka 1st Khelo India Tribal Games kaba la poi sha kaba kut ha Chhattisgarh bad ka la wan ha ka kyrdan ba khadlai napdeng ki jylla jong ka ri.
Kitei ki ar tylli ki takma ksiar ki la wan lyngba ki kynhun ki nongsiat ïalehkai khnam kynthei bad shynrang jong ka Compound. Kane ka la wan lyngba ka kynhun jong ki kynthei kaba kynthup ïa ka Kate Diamond Lyngdoh, Nakibansharai Khonghat bad u Stracy M Sangma, ha kaba ka la jop ïa ka Nagaland da 208-205 poiñ. Katba ka kynhun jong ki shynrang kaba kynthup ïa u Phrangkupar Kharjahrin, Banwan-bor Marweiñ bad u Donkupar L Shadap, ki la lah ban pynliem noh ïa ka Assam da 219-216 poiñ.
Kumjuh kawei pat ka kynhun ki rangïalehkai siatkhnam ka la khur ïa ka takma rnong ha ka recurve, hadien ba ka la pynliem ïa ka Telangana da 6-2 poiñ ha Raipur. Ïa kane ka kynhun la mihkhmat da ki shikur kata u Hypormi Wanñiang, Amebalaker Wanñiang bad u Manchiefford Wanñiang.
Ka Jylla ka la khur ruh hynriew tylli kiwei pat ki takma rnong lyngba kiwei pat ki jingïalehkai. Ïa ki lai tylli ki takma rnong la khur lyngba ka jingïalehkai athletics kata ka Balarisha Thyrniang ha ka 10000m (10km) race, ka Bethlyne G Makri ha 10000m race walk bad ka Melibad Kro ha ka shot put. Ïa kiwei pat ki takma rnong la khur da ka Verem Gedaliah Nongsiej ha ka jingïakop jngi jong ka 50m freestyle, kumjuh ka Larityngkai Lawriniang ha ka jingïakop rahnar (weightlifting) jong ka 53kg bad u Juh Pa U Juh Nongtdu ha ka Greco-Roman wrestling jong ka 60kg.
Kumba ka paw ka Meghalaya ka la wan ha ka kyrdan ba san napdeng ki jylla ka thaiñ shatei lammihngi, kata hadien ïa ka Arunachal Pradesh, Assam, Mizoram bad ka Nagaland.
