Jowai, Ïaïong 07
Ka jingïalang paidbah kaba heh kaba la khot pynlong da ka Jaiñtia Coal Miners and Dealers Association (JCMDA) ha East Jaiñtia Hills ha ka 7 tarik Ïaïong ka la wanrah ïa ka jingsangeh ïa ka kamai kajih bad la sakhi ba la khang lut ki dukan naduh Ladrymbai haduh Khliehriat ne shilynter ka surok bah NH 6, katba ki nongtih dewïong ki dawa ïa ka polisi tih dewïong kaba biang bad ïahap bad ka Jylla.
Shuwa ban sdang ïa ka rally, ka JCMDA ka la pynlong ïa ka jingïalang paidbah ha madan Teilang Phawa Playground ha Dkhiah West. Hadien kane, ki paidbah ki la ïaid paidbah shaduh ophis u Deputy Commissioner ha Khliehriat, ha kaba ki nongïalam ka JCMDA ki la aiti ïa ka dorkhas ha u DC ka East Jaiñtia Hills, u Manish Kumar, IAS, ban pynpoi sha u Myntri Rangbah ka Jylla, u Conrad K Sangma.
U Vice President ka JCMDA, u Bah Justine Dkhar, uba la pynïaid ïa ka jingïalang, u la ong ba ka Association ka la buh por lai bnai ïa ka Sorkar ban leh ïa kaba donkam. Lada ym lah ban leh eiei hapoh kane ka por, ka JCMDA kan sa shim da kiwei pat ki sienjam ban pynurlong ïa ki jingdawa jong ki paidbah.
U Bah Justine u la ong ruh ba ka open-cast mining ne ka jingtih dewïong liewlong ka lah ban treikam tang ha katto katne ki jaka, hynrei kumba 90 percent ki jaka tih dewïong kim ïahap namar u dewïong u don kumba 100 phut shapoh khyndew. Kumta, u la kyntu ïa ka Sorkar ban pynkylla ïa ka mining plan bad ban wanrah ïa ka plan kaba ïahap bad ka jinglong ka jaka.
U la kdew ruh ïa ka jingeh kaba ki paidbah ki ïakynduh namar ka jingkhang ïa ka jingtih bad ka jingkit dewïong, da kaba ong ba kane ka kam ka dei kaba ki paidbah ki im jakpoh naduh mynshwa, bad mynta ka la ktah jur ïa ka ïoh ka kot jong ki longïing longsem.
U President ka JCMDA, u Bah Borin Shadap, u la ong ba kane ka jingïakhih ka dei tang ka jingsdang bad lada ka Sorkar kam sngap, kin sa nang pynjur ïa ka jingïakhih, wat ban leit tur sha Secretariat lada donkam.
U Legal Adviser ka JCMDA, u muktiar Kerlang Ksoo, u la ong ba ka jingbym don ka polisi kaba shai ka la ktah ïa ka kamai kajih, ka pule puthi bad ka ïoh ka kot jong ki paidbah. U la ban jur ba ka Sorkar ka dei ban wanrah ïa ka polisi kaba treikam bad jingïatreilang bad ka tnad Mining and Geology.
Ki longkmie kiba im na kane ka kam ki la pynpaw ïa ka jingsngewkhia kaba jur, da kaba ong ba ka jingkhang dewïong ka la ktah ïa ka pule puthi jong ki khun bad pynlong ïa kiba bun ban leit wad kam shabar.
Ha kane ka jingïalang la donlang ki MDC kiba mynta bad kiba rim, kynthup u MP barim u Ma Vincent H Pala, ki nongïalam Synjuk Waheh Shnong, u President jong ka Jaiñtia National Council, u Bah Sambormi Lyngdoh bad kiwei-kiwei.
